Зверхнік беларускіх аўтакефалістаў узначаліў малебен на месцы Аршанскай бітвы

малебенУ субботу, 6 верасня, на Крапівенскім полі пад Оршай адбылося ўрачыстае святкаванне 500-годдзя перамогі войска Вялікага княства Літоўскага 8 верасня 1514 года над маскавітамі. Урачыстае святкаваньне пачалося малебнам, які праводзілі архіепіскап Беларускай аўтакефальнай праваслаўнай царквы Святаслаў (Логін) і святар БАПЦ Леанід Акаловіч.

Па словах апошняга, аршанская бітва натхніла беларусаў “на змаганне за незалежнасць», перадае Радыё Свабода.

Мастак Мікола Купава нагадаў, што афіцыйнае святкаванне было забаронена. Ён апавёў пра значэнне бітвы под Оршай, паведаміў, што 23 кастрычніка ў Палацы мастацтва ў Мінску адкрыецца вялікая выстава, цалкам прысвечаная 500-годдзю бітвы.

Гісторык Алесь Краўцэвіч у сваім выступе адзначыў, што значэнне гэтай бітвы асабліва важнае цяпер, бо сёння Беларусь мае таго ж самага ворага. Паводле яго словаў, “у свабоднай Беларусі тут мусіў бы быць міністар абароны, тут мусілі б прымаць прысягу салдаты».

Пасля таго, як музыка Зміцер Вайцюшкевіч выканаў песню «Наш сцяг», каля крыжа адбыўся дударскі канцэрт. Перад гэтым там былі ўсталяваныя бел-чырвона-белыя сцягі.

На святкаванні з Мінску на аўтобусе прыехала больш за 20 чалавек, якіх двойчы спынялі міліцыянты, папярэдзіўшы, каб аўтобус не заяжджаў у Воршу пасля святкаванняў. Старшыня Крапівенскага сельсавету таксама папярэдзіў, каб на полі не праводзіліся палітычныя мерапрыемствы, была прыбраная тэрыторыя і ўвечары 6 верасня ўсе раз’ехаліся.

Як паведамляла “Крыніца”, 8 верасня ў Гродне адбудзецца святая Імша ў гонар 500-годдзя перамогі пад Воршай. Імша будзе цэлебрацвацца на лаціне ў катэдральным касцёле святога Францішка Ксаверыя. Таксама адбудзецца супольны канцэрт польскага, літоўскага, беларускага хораў. Ад беларусаў спяваць будзе хор “Унія”. Плануецца ўдзел амбасадараў. Да святочнага настрою дакладуцца таксама рыцарскія клубы.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі