“Біблінг” у Беларусі пад забаронай?

біблінг2
photo — facebook.com/bibleing

Папулярную ў суседняй Польшчы хрысціянскую ініцыятыву “біблінг”, якая праходзіць у самых людных месцах польскіх гарадоў — на галоўных плошчах, вакзалах і гэтак далей, у Беларусі рэалізаваць наўрадці ўдасца.

Наколькі рэальна правядзенне падобных мерапрыемстваў у Мінску, мы папрасілі пракаментаваць прэс-сакратара ГУУС Мінгарвыканкама Аляксандра Ластоўскага. “Парадак правядзення мерапрыемстваў указаны ў законе “Аб масавых мерапрыемствах”. Там напісана, якія масавыя акцыі, што ёсць масавым мерапрыемствам – усё ёсць у законах”, — паведаміў ён.

Што значыць у Беларусі арганізацыя масавых мерапрыемстваў КРЫНІЦЫ.INFO распавяла супрацоўніца праваабарончага цэнтру “Вясна”, грэка-каталіцкая верніца Наста Лойка.

“У нас па законе аб масавых мерапрыемствах даецца вельмі шырокае трактаванне пікету, і такія дзеянні, безумоўна, патрапяць пад яго. Адпаведна, па тым жа законе для правядзення «біблінгу» спатрэбіцца заяўка ў выканкам не пазней чым за 15 дзён (і адказ прыйдзе не пазней за пяць). Было б вельмі цікава паглядзець, якая будзе рэакцыя ўладаў на такую заяку”, — адзначыла яна.

Варта толькі памятаць, падкрэсліла праваабаронца, што па законе існуе вялікі спіс абмежаванняў па дазволеных месцах для правядзення масавых мерапрыемстваў. Іх нельга праводзіць на аб’ектах грамадскага транспарту, у тым ліку вакзалах, на адлегласці менш за 50 метраў ад будынкаў органаў улады і дыппрадстаўніцтваў, органаў пракуратуры, судоў, школаў, дзіцячых садкоў, на адлегласці менш за 100 метраў ад будынкаў аховы здароўя і гэтак далей. Да таго ж правядзенне масавых мерапрыемстваў забаронена на тэрыторыях, бліжэйшых за 200 метраў ад рэзідэнцый прэзідэнта, Савета міністраў, Нацыянальнага сходу, падземных пераходаў і станцый метро —  гэта значыць у найбольш людных месцах беларускай сталіцы.

“Пры гэтым ёсць яшчэ асобная працэдура, калі духавенства асобна дамаўляецца з уладамі на правядзенне асобных мерапремстваў, але тут (у біблінгу – рэд.) якраз каштоўнасць, як мне падаецца, у больш нізавой ініцыятыве. І тут праблема выключна ў беларускім заканадаўстве, якое блакуе само права свабоды сходаў”, — мяркуе Наста Лойка.

Як паведамляла КРЫНІЦА.INFO, у Польшчы ўсё большую папулярнасць набірае хрысціянская ініцыятыва пад назвай «біблінг». Удзельнікі акцыі загадзя дамаўляюцца, у асноўным праз сацыяльныя сеткі, пра яе правядзенне. У канкрэтным месцы і ў канкрэтны час яны садзяцца спінамі адзін да аднаго і чытаюць пэўны фрагмент Бібліі і на працягу 15 хвілін разважаюць над ім. Затым яны ўстаюць і, падзяліўшыся на групкі, дзеляцца сваімі думкамі, пасля чаго сыходзяць.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі