Кандрусевіч прыняў удзел ва ўрачыстасцях актавы малітваў да Маці Божай Вастрабрамскай у Вільні

кандрусевіч16 лістапада ў Вільні завяршылася актава малітваў да Маці Божай Вастрабрамскай, у якой некалькі разоў цэлебраваліся святыя Імшы на беларускай мове з удзелам вернікаў з Беларусі.

У апошні дзень актавы ва ўрачыстасцях прыняў удзел Мітрапаліт Мінска-Магілёўскі арцыбіскуп Тадэвуш Кандрусевіч. Ён звярнуўся да некалькіх тысяч вернікаў з акна Вастрабрамскай капліцы, паведамляе catholic.by.

Беларускі акцэнт сёлетніх урачыстасцяў быў вельмі моцным і заўважальным: у Беларусі цудатворны абраз Маці Божай Вастрабрамскай вельмі добра вядомы і набажэнствы да Яе шырока распаўсюджаны.

У гаміліі беларускі іерарх прыгадаў аб тым, што надпіс на сцяне капліцы на лацінскай мове “Sub Tuum praesidium confugimus” – “Пад Тваю абарону прыбягаем” – вельмі добра нагадвае сутнасць гэтага святога месца. Многія стагоддзі, па словах Тадэвуша Кандрусевіча, людзі розных нацыянальнасцяў і веравызнанняў спяшаюцца сюды, каб прасіць дапамогі Панны Марыі, а сама Вострая Брама насычана духоўнасцю.

Мітрапаліт нагадаў вернікам, што культ Божай Міласэрнасці цесна звязаны з Вострай Брамай. Менавіта ў ёй у 1935 годзе першы раз быў выстаўлены для публічнага пакланення абраз Езуса Міласэрнага. З гэтага месца культ Божай Міласэрнасці распаўсюдзіўся на ўвесь свет.

Арцыпастыр адзначыў, што дарога з Вострай Брамы вядзе проста ў Мінск і потым далей на Маскву. Божая міласэрнасць праз Вострую Браму прыйшла ў Бацькаўшчыну, лiчыць ён. Пасля трох пакаленняў ганенняў Касцёл атрымаў свабоду, як гэта прадказала Марыя ў Фаціме.

Іерарх дадаў, што сёння, цешачыся з дару свабоды і новых магчымасцяў для Касцёла, мы адначасова бачым, што працэс духоўнага адраджэння вельмі складаны, асабліва беручы пад увагу нарастаючыя тэндэнцыі секулярызму і лібералізму, якія з’яўляюцца вялікай пагрозай для духоўнага адраджэння.

Мітрапаліт падкрэсліў, што быць веруючым азначае “жыць верай не толькі ў касцёле, але і за яго парогам”, азначае “быць сведкамі Евангелля”.

Па словах Мітрапаліта, сёння, калі мы наракаем на свет, на палітыкаў, эканамістаў і г.д., трэба распачаць аднаўленне свету ад сябе саміх і паслухаць параду Марыі: “калі будзеце маліцца і навернецеся, усё будзе добра”.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі