Новы рэктар МінДА працягне рэфармаванне духоўнай адукацыі ў Беларусі

akimovЗацвярджэнне Святым Сінодам Рускай Праваслаўнай Царквы прызначэння Беларускім Экзархатам на пасаду рэктара Мінскай духоўнай акадэміі іераманаха Сергія (Акімава) адбылося 25 снежня.

Пра сваё бачанне далейшага развіцця дзейнасці Акадэміі іераманах Сергій распавёў афіцыйнаму сайту БПЦ church.by.

«На пасадзе рэктара мне трэба будзе працягнуць тую працу па рэфармаванні духоўнай адукацыі ў Беларусі, якая была даручаная мне яшчэ ў 2012 годзе. У ходзе гэтай працы нам удалося змяніць структуру духоўнай адукацыі, практычна з нуля стварыць нарматыўную базу для адукацыйнага працэсу, стварыць кафедры, пачаць падрыхтоўку магістраў па трох напрамках, перайсці на штатна-заробкавую сістэму аплаты працы выкладчыкаў, прынцыпова змяніўшы патрабаванні да прафесарска-выкладчыцкага склада, пакласці пачатак штогадовай атэстацыі выкладчыкаў, упершыню адкрыць завочнае навучанне, – кажа іераманах Сергій».

У гэтым годзе акадэмія пераедзе ў Мінск, дзе размесціцца ў будынках Духоўна-адміністрацыйнага і адукацыйнага цэнтра Беларускай Праваслаўнай Царквы. З пераездам будуць створаныя самыя спрыяльныя ўмовы для адкрыцця аспірантуры, мяркуе рэктар МДА.

Зараз у сістэме духоўнай адукацыі Беларускага Экзархата пераглядаюцца падыходы да падрыхтоўкі кадраў вышэйшай навуковай кваліфікацыі са ступенню кандыдата багаслоўя. Так, па словах рэктара, у 2013 годзе было прынятае «Палажэнне аб парадку падрыхтоўкі і абароны кандыдацкіх дысертацыяў у Мінскай духоўнай акадэміі», складзенае з улікам патрабаванняў Вышэйшай атэстацыйнай камісіі.

«Пра тое, наколькі сур’ёзна змяніліся патрабаванні да кандыдацкіх дысертацыяў, сведчыць той факт, што ў 2014 годзе была абароненая толькі адна дысертацыя», – кажа іераманах Сергій.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі