Рымашэўскі: дух шавінізму вядзе Расію да катастрофы (абноўлена)

рымашэўскіГалоўны рэдактар рэсурсу «Спадарожнік і пагром» Ягор Прасвірнін лічыць, што Расіі трэба «вярнуць» «так званыя» Беларусь, Украіну і Казахстан. У артыкуле «За што мы стаім, чаго мы хочам, што будзе і чаго не будзе» аўтар заяўляе, што «мэтай з’яўляецца пабудова дэмакратычнай еўрапейскай прававой рускай нацыянальнай дзяржавы, як адзінай формы калектыўнага жыцця, якая спрыяе захаванню рускіх у ліку народаў Першага свету».

КРЫНІЦА.INFO папрасіла пракаментаваць гэтае выказванне сустаршыню аргкамітэту па стварэнні партыі “Беларуская хрысціянская дэмакратыя” Віталя Рымашэўскага.

«Такія выказванні ў сёняшняй сітуацыі не могуць ужо абразіць ні беларусаў, ні ўкраінцаў. Бо менавіта такіх адыёзных “дзеячаў” расійскай журналістыкі, палітыкі і культуры апошнім часам з’явілася шмат. І ў бліжэйшай будучыні не толькі Беларусь, Украіна і Казахстан не далучацца да Расіі, але саму Расію чакае глыбокі дэградацыйны распад. Дух шавінізму, якім насычана жыццё сёняшняй Расіі, непазбежна вядзе гэтую краіну і народ да катастрофы. Таму падобныя выказванні выклікаюць спачуванне і жаль. Хочацца пажадаць гэтаму чалавеку царкоўнага пакаяння, а калі ён няверуючы, то яму трэба звярнуцца за дапамогай да прафесійнага псіханеўролага”, – адзначыў ён.

Стральцоў-Карвацкі: мы павінныя ўмоцоўваць усе фактары, якія спрыяюць устойлівасці нашай дзяржаўнасці

старльцоўСваё меркаванне на гэты конт выказаў і намеснік старшыні Партыі БНФ Алесь Стральцоў-Карвацкі:

“Праграмныя заявы “Спадарожніка і пагрома” супраць дзяржаўнасці Рэспублікі Беларусь – гэта найбольш яскравае сведчанне агрэсіўных памкненняў расійскага вялікадзяржаўніцкага шавінізму. Прасвірнін піша і гаворыць тое, што насамрэч складае частку ідэйнага падмурку сённяшняй расійскай дзяржавы. Як для расійскіх ультранацыяналістаў, так і для сённяшняга Крамля, застаецца непераадольным сутнаснае супярэчанне паміж інтарэсамі выжывання рускага народу і рэваншысцкімі настроямі, заснаванымі на настальгіі па былой імперыі. Для нас, беларускіх нацыяналістаў, няма розніцы ў якой ідэалагічнай форме абгрунтоўваецца імперскі рэванш – у посткамуністычнай зюганаўскай, нацыяналістычнай прасвірынскай альбо гэбоўскай пуцінскай. Для нас яны ўсе ёсць ворагі, якія не прызнаюць права беларускага народа на самавызначэнне. Што да патэнцыялу сённяшняй Расіі для рэалізацыі гэтых памкненняў – то ён мізэрны. Расія цяпер можа захапіць толькі слабога. Таму мы павінныя ўмоцоўваць усе фактары, якія спрыяюць устойлівасці нашай дзяржаўнасці – і тады мы здолеем абараніць сабе”.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
06.01.2015 Каментары і аналітыка| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты