Для стварэння «Народнай Бібліі» неабходна 1189 добраахвотнікаў

5DDC950B-C66C-4BE3-A0B4-111056D698D0_mw1024_s_n

У Беларусі праводзіцца акцыя «Народная Біблія». Больш падрабязна пра гэта карэспандэнт КРЫНІЦА.INFO папрасіла расказаць каардынатара акцыі – лідэра Хрысціянскай дзелавой ініцыятывы, сустаршыню аргкамітэта па стварэнні партыі “Беларуская хрысціянская дэмакратыя” Георгія Дзмітрука.

– Мы ўсе ведаем, што ёсць Біблія і для ўсіх гэта зразумела. А што такое «Народная Біблія»?

– Біблія аб’ядноўвала і цяпер аб’ядноўвае простых людзей і нават цэлыя нацыі. Народная Біблія – гэта салідарнасць беларусаў з мэтай будавання лепшай будучыні на аснове хрысціянскіх каштоўнасцяў. Гэта акт прымірэння на аснове любові і прабачэння. Гэта крок у бок нацыянальнай самасвядомасці і павагі. Народная Библия – гэта выбар на карысць беларускага і хрысціянскага.

– Чым яна будзе адрознівацца ад звычайнай Бібліі?

– «Народная Біблія» – гэта звычайная Біблія, толькі перапісаная ад рукі беларусамі на беларускай мове.

– Як хутка плануецца стварыць такую Біблію?

– Першы этап – перапіс Псалтыра 2014-2015 гады. Другі этап – перапіс Евангелляў 2015-2016. Колькасць кніг у Бібліі – 66. Стары Запавет – 39 кніг. Новы запавет – 27 кніг. Стары Запавет складаецца з 929 глаў, Новы – з 259 глаў. Усяго колькасць глаў у Бібліі – 1189.

Каб стварыць «Народную Біблію», неабходна 1189 добраахвотнікаў, якія жадаюць ўласнаручна перапісаць ўсяго адну главу з любой кнігі Бібліі на беларускай мове ў любым перакладзе.

У 2017 годзе споўніцца 500 гадоў выданню «Псалтыра» Францыска Скарыны. Да гэтай даты плануецца прэзентацыя «Народнай Бібліі».

– Каму прыйшла ідэя стварыць рукапісную Біблію на беларускай мове?

– Ідэя стварэння “Народнай Бібліі” належыць журналісту, кандыдату філасофскіх навук Уладзіміру Падголу.

– Якая мэта такой акцыі?

– Наша мэта – стварэнне нацыянальнага хрысціянскага Сымбаля, які аб’ядноўвае хрысціянаў. Мы хочам паспрабаваць прыцягнуць увагу грамадства да хрысціянскіх святыняў. Паспрабаваць прапанаваць грамадству Біблейскі шлях вырашэння надзённых праблем. Гэта будзе спрыяць яднанню беларускіх хрысціянаў у гістарычным кантэксце. А таксама, гэта станоўча паўплывае на хрысціянскую і грамадзянскую салідарнасць.

Першы правобраз Сымбаля веры з’яўляецца ў Апостала Паўла: “Бо я найперш перадаў вам, што і сам прыняў, гэта значыць, што Хрыстос памёр за грахі нашыя, паводле Пісаньня, і што ён пахаваны быў, і што ўваскрос на трэці дзень …» (1 Кар . 15: 3-7).

Варта ўзгадаць, якое аб’ядноўчае значэнне Сымбаля Веры, прынятага на Першым Сусветным Саборы ў 325 годзе. З гэтага моманту пачалася новая эра ў развіцці хрысціянства.

Вялікае гістарычнае значэнне мелі выданні друкаванай кнігі Псалтыр Францыска Скарыны для беларусаў, Астрожскай Бібліі для славян, Гютенбергский Бібліі для немцаў, і іншых выданняў Святога Пісання.

Выдаўцы Бібліі не меркавалі аб нацыянальным і гістарычным значэнні сваіх «праектаў». Яны, часцей за ўсё, дзейнічалі інстынктыўна, неўсвядомлена, часта насуперак здароваму сэнсу. З гадамі, спробы выдання Святога Пісання на нацыянальнай мове набывалі гістарычны і  аб’ядноўчы сэнс.

– Хто можа прыняць удзел у стварэнні “Народнай Бібліі»? Нейкія крытэрыі адбору ёсць?

– Ужо сама назва кажа за сябе – «Народная Біблія», а значыць, у яе стварэнні можа прыняць кожны, хто адносіць сябе  да беларускага народу, хто лічыць сябе хрысціянінам.

Створаны Аргкамітэт. У яго ўваходзяць Алесь Ліпай, Павел Севярынец, Зміцер Дашкевіч і я, Георгій Дзмітрук. Трэба 1189 добраахвотнікаў. Для каардынацыі дзеянняў неабходна звязацца па электроннай пошце bible.people.by@gmail.com са мной.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
09.01.2015 Грамадства| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты