У гарадах Беларусі ўшанавалі памяць ахвяр Халакоста

равінМерапрыемства, прысвечанае Міжнароднаму дню памяці ахвяр халакосту, прайшло 27 студзеня ў Брэсце. Ля мемарыяльнага знака ў памяць аб Брэсцкім гета сабраліся члены габрэйскай абшчыны, дыпламаты, прадстаўнікі грамадскасці. Цырымонія пачалася з хвіліны маўчання «у памяць пра тых, хто загінуў у Халакост, хто гіне сёння ад тэрактаў», адзначыла кіраўнік брэсцкага гарадскога яўрэйскага грамадскага аб’яднання «Брыск» Рэгіна Сіманенка.

Памінальную малітву прачытаў брэсцкі рабін Хаім Рабіновіч, сваякі якога загінулі ў Асвенціме. У завяршэнне мерапрыемства ўдзельнікі цырымоніі ўсклалі кветкі да мемарыяльнага знака, перадае БелТА.

У Віцебску 28 студзеня ў абласной бібліятэцы прайшоў вечар памяці «Каб памяталі…», арганізаваны ВГА «Гарадская габрэйская грамада» і ВБГА «Хасдэй Давід». Прысутным прадставілі міні-спектакль Магілёўскага народнага габрэйскага тэатра «Шалом» «Чамадан успамінаў», у аснове якога ляжыць расповед пра няпросты лёс рэжысёра тэатра Міры Джаліяшвілі, паведамляе beljews.org.

Таксама быў паказаны фільм рэжысёра Барыса Мафцыра «Захавальнікі памяці». Здымкі сумеснага ізраільска-беларускага дакументальнага фільма праходзілі ў месцах масавых расстрэлаў яўрэйскага насельніцтва фашыстамі на тэрыторыі Беларусі. Фільм складаецца з апавяданняў відавочцаў. Асаблівую цікавасць выклікала выстава кніг і перыядычных выданняў «Памяць жывая…».

Прысутныя ўшанавалі памяць ахвяраў Халакосту запальваннем свечак, рабін Віцебска Шымшон Даніэль Изаксон прачытаў памінальную малітву.

А ў Магілёве да каменя памяці на памінальную малітву прыйшлі больш за два дзясяткі чалавек. Па яўрэйскай традыцыі яны ўсклалі каменьчыкі і запалілі шэсць свечак у памяць аб шасці мільёнах габрэяў, знішчаных фашыстамі ў гады Другой сусветнай вайны, паведамляе беларуская рэдакцыя «Радыё Свабода».

«Антысемітызм — з’ява, якая мае ірацыянальны характар і ірацыянальную прыроду. Ён правакуе людзей», — адзначыў па заканчэнні памінальнага Кадышу стараста магілёўскай сінагогі Сымон Глазштэйн.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
02.02.2015 Грамадства| Тэгі: , , , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты