“Крынічка”. Сшытак у клетачку – Аб спячым Езусе і аб асцярожнай буры

xjt“Крынічка” працягвае публікацыю сусветнай хрысціянскай класікі. Спецыяльна для дзетак – апавяданні каталіцкага святара-пісьменніка – Яна Твардоўскага.

Яго творы ўжо папулярныя ў многіх краінах свету і перакладзеныя на 15 моваў, у тым ліку і на беларускую. Яго імя нададзена больш чым 200 школам Польшчы. А сярод шматлікіх узнагарод святар найбольш цаніў званне Кавалера Ордэну Ўсмешкі – міжнароднай ўзнагароды, якая ўручаецца за дзеянні, якія прыносяць дзецям радасць.

Ксёндз Ян пісаў і вершы, і прозу: светла і проста аб веры і Госпадзе, так каб было зразумела нават самым маленькім. Яго апавяданні для ўсёй сям’і: для чытання разам, для разважання і для радасці. Яны напоўненыя бесклапотным гумарам, яны добрыя і шчырыя як дзеці, якіх ксёндз Ян вельмі любіў. Яны кажуць, што Госпад гэта добры сябар і пазнаёміцца з Ім трэба яшчэ ў дзяцінстве.

Аб спячым Езусе і аб асцярожнай буры

115718Найчасцей мы бачым Яго спячага ў яслях, а калі спяваем у калядцы: “Анёлы, заспявайце! Зайграйце, пастушкі! Паклон Яму аддайце, Валадары зямлі” – не вельмі сабе ўяўляем, як Езус мог спаць, калі хлопцы гудзелі на інструментах, трое турыстаў за раз сунулася ў маленькае жытло, а анёлы…

Я думаю, што анёл таксама можа пабудзіць. Колькі разоў ён сніўся святому Юзафу, а пасля адразу яго будзіў, каб важны сон не вылецеў у яго з памяці!

Езус мог паспаць найчасцей хіба што тады, калі быў дзіцём – але што зробіш, калі дзяцінства само мінае, як сон.

Ён пачаў з прабывання ў пустыні спакусы, гэта значыць з Вялікага Няспання – не спаў цэлых сорак дзён запар.

Потым Яго часта будзіў Нікадэм, бо па начах прыходзіў і распытваў.

Але нікога немагчыма пабудзіць ветліва.

Евангелле шмат разоў распавядае, што Езус праводзіў час за малітвай. Ён не спаў ноччу ў садзе Аліўным. Не спаў нават пасля ўваскрасення, бо на світанку ўжо хадзіў каля возера. Толькі ў адным месцы напісана, што Ён спаў – на дне лодкі. Якой жа асцярожнай можа быць страшная бура! Раўла, але Езуса не пабудзіла.

Будзіць Яго той, хто заўчасна баіцца.

Пераклад Вольгі Севярынец

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі