Турэмны святар: асуджаныя патрабуюць навяртання

RV1052_ArticoloЗ дэкрэту каталіцкага біскупа Пінскага Антонія Дзям’янкі, пробашч парафіі Узвышэння Святога Крыжа ў Нароўлі кс. Вінцэнт Сяўрук ужо два гады вядзе душпастырства ў турмах Гомельскай вобласці.

Як кажа святар, ён адчуў, што яго служэнне – запатрабаванае, і асуджаныя чакаюць святара, бо патрабуюць навяртання.

Ксёндз перакананы, што гэтыя сустрэчы вельмі патрэбныя – нават дзеля адной авечкі, што Езус шукае, каб прывесці назад, у Божую аўчарню.

Людзі, якія адбываюць пакаранне, часта дзякуюць за святарскае служэнне, і, калі развітваюцца з духоўнай асобай, запрашаюць прыехаць зноў, адзначыў кс. Вінцэнт Сяўрук у інтэрв’ю Беларускай рэдакцыі Ватыканскага радыё.

Кожны з асуджаных мае права падаць просьбу кіраўніцтву калоніі, каб мець магчымасць сустрэцца з каталіцкім святаром. Па дазволу чалавек можа прысутнічаць на сустрэчы з духоўнай асобай, праняць удзел у Эўхарыстыі, слухаць Божае слова, удзельнічаць у катэхезе, прыступіць да споведзі, прыняць св. Камунію.

Святар бывае ў калоніі раз на месяц.

Кс. Вінцэнт дасвечыў, што, менавіта апынуўшыся ў зняволенні, чалавек прыходзіць да Бога, навяртаецца, і зусім у іншым вымярэнні перажывае сваё адбыванне пакарання – як выкупленне за ўчыненыя злачынствы.

У зняволенні жанчыны і мужчыны маюць магчымасць чытаць каталіцкія часопісы, з дазволу кіраўніцтва калоній бібліятэкі папаўняюцца каталіцкай літаратурай.

Вельмі шмат выпадкаў, калі людзі адышлі ад Бога і жылі без Яго, і наступствамі такога жыцця стала тое, што чалавек здзейсніў злачынства і апынуўся ў турме. На свабодзе не мог зразумець сваіх праблем, кораня зла– пакуль не апынуўся ў турме, кажа турэмны душпастыр.

Бліжэй да Вялікадня кс. Вінцэнт зноў збіраецца да сваіх “падапечных”, каб прынесці ім радасць уваскрослага Хрыста.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі