Больш за мільён чалавек запісаліся паглядзець на Турынскую плашчаніцу

150419202011_pilgrims_holy_shroud_cathedral_turin_624x351_ap

З 19 красавіка па 24 чэрвеня Турынская плашчаніца будзе адкрыта для агляду ў галоўным каталіцкім храме горада. Плата за прагляд не прызначаная, але абавязковы папярэдні запіс. Ужо на вэб-сайце для наведвання экспазіцыі зарэгістраваліся каля мільёна чалавек. У 2010 годзе паглядзець на плашчаніцу прыйшлі 2,5 млн чалавек.

21 чэрвеня, падчас наведвання рэгіёну П’емонт на поўначы Італіі, плануе здзейсніць паломніцтва да рэліквіі Папа рымскі Францішак, паведамляе bbc.co.uk.

Перш чым патрапіць у сабор, дзе захоўваецца плашчаніца, трэба выстаяць у доўгай чарзе і прайсці кантроль бяспекі.

Плашчаніца будзе дэманстравацца ў саборы Яна Хрысціцеля штодня на працягу 12 гадзін у куленепрабівальным шкляным каўчэгу, усярэдзіне якога падтрымліваецца пастаянны мікраклімат.

Рыма-Каталіцкая Царква не прызнае плашчаніцу сапраўднай, аднак лічыць яе важным напамінам пра Пакуты Хрыстовы.

Арцыбіскуп Турына Чэзарэ Назілля сказаў: “Яна не з’яўляецца сама па сабе доказам веры, паколькі гэта не аб’ект ні веры, ні глыбокай пашаны, аднак яна здольная ўмацаваць веру”.

Многія вернікі перакананыя, што ў Турынскую плашчаніцу было абгарнута перад пахаваннем цела Ісуса Хрыста яго вучнямі пасля таго, як ён быў распяты на крыжы.

Паводле даследаванняў навукоўцаў, праведзеных у 1988 годзе, плашчаніца была выраблена паміж 1260 і 1390 гадамі.

Некаторыя эксперты аспрэчваюць такія высновы, лічачы, што даследавалася не сама плашчаніца, а пазнейшыя латкі, альбо матэрыялы, якія трапілі на тканіну падчас двух перажытых ёю пажараў.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі