Лукашэнка пажартаваў з вышэйшага духавенства: няма дзяцей – значыць не людзі

lukashenko-2904-3 Аляксандр Лукашэнка падчас звароту з пасланнем да народа Беларусі і Нацыянальнага сходу 29 красавіка пажартаваў з вышэйшага духавенства Праваслаўнай і Каталіцкай Цэркваў, якія заклікаюць усіх мець дзяцей, але самі застаюцца бяздзетнымі.  (гл.відэа напрыканцы матэрыяла)

Прэзідэнт Беларусі падчас свайго выступу, які транслюецца ў прамым эфіры Першага канала беларускага тэлебачання і Першага канала беларускага радыё, прывёў змест сваіх гутарак з царкоўнымі іерархамі на тэму актыўных заклікаў з боку хрысціянскіх канфесій да грамадзян мець вялікія сем’і. Паводле слоў Аляксандра Лукашэнкі, на прамое пытанне, ці ёсць у іх дзеці, нейкія неназваныя “свяцейшаствы” і “правялебнасці” у гутарках з прэзідэнтам адказвалі адмоўна. “Дык што ж вы нас тады заклікаеце?”, – прылюдна здзівіўся Аляксандр Лукашэнка. Паводле яго гумарыстычнай ацэнкі, калі няма дзяцей – значыць не чалавек. Пры гэтым кіраўнік дзяржавы ў жарт усумніўся ў сумленнасці царкоўных іерархаў, выказаўшы перакананне, што ўсё ж недзе ў вышэйшага духавенства ёсць дзеці. “Я нават ведаю гэта”, – са смехам рэзюмаваў прэзідэнт, выклікаўшы смех і ў Авальнай зале.

Між тым, традыцыяй Рускай Праваслаўнай царквы прадугледжана, што ўсе царкоўныя чыны, пачынаючы з епіскапа, добраахвотна прымаюць абет бясшлюбнасці. Існуе падзел на так званае белае (можна мець сям’ю) і чорнае святарства (сям’ю мець не дазволена). У Каталіцкай царкве зарок цэлібату (бясшлюбнасці) даюць усе святары. Дадзеныя рашэнні з’яўляюцца знакам асаблівага прысвячэння духавенства на служэнне Богу.

У якасці падставы для такой традыцыі часта прыводзяцца словы апостала Паўла з 1-га паслання Карынфянам: Нежанаты клапоціцца пра Гасподняе, як дагадзіць Госпаду; а жанаты клапоціцца пра зямное, як дагадзіць жонцы … Але хто непахісна цвёрды ў сэрцы сваім і, ня змушаны патрэбаю, а маючы ўладу ў сваёй волі, рашыўся ў сэрцы сваім аберагчы сваю цноту, той добра робіць. (1 Кар. 7: 32,37).

У пратэстантызме такія абяцанні не прыносяцца. У Беларусі большасць святароў Евангельскіх цэркваў маюць вялікія сем’і. Акрамя таго, усе хрысціянскія канфесіі заклікаюць да стварэння вялікіх сем’яў, грунтуючыся на меркаванні Бібліі, што дзеці – гэта дабраславенне ад Бога. У кнізе Псалтыр, у прыватнасці, гаворыцца: Вось спадчына ад Госпада: дзеці; ўзнагарода ад Яго – плод чэрава. (Псалтыр 126: 3).

У народзе лічыцца, што вышэйшае духавенства традыцыйных хрысціянскіх канфесій добраахвотна адмаўляецца ад права мець сям’ю і дзяцей, каб лепш ажыццяўляць апеку аб дзецях Божых – г.зн. аб усіх верніках. Такое прысвячэнне архіпастыраў карыстаецца асаблівай павагай з боку простых вернікаў.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
29.04.2015 Грамадства| Тэгі: , , , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты