УГКЦ і УАПЦ (а) дамовіліся працягнуць дыялог аб аб’яднанні

украіна28 траўня ў Кіеве адбылася першая сумесная міжканфесійная сустрэча паміж Украінскай Грэка-Каталіцкай Царквой і Харкаўска-Палтаўскай епархіяй УАПЦ (афіцыйна зарэгістраваная як Украінская Аўтакефальная Праваслаўная Царква (абноўленая). У склад дэлегацый ўвайшлі епіскапы, святары і свецкія з абодвух бакоў, у тым ліку і зверхнікі абедзвюх Цэркваў: вярхоўны архіепіскап УГКЦ Святаслаў (Шаўчук) і архіепіскап Харкаўскі і Палтаўскі Ігар (Ісічэнка).

Сцвердзіўшы, ва Украіне існуе адна Царква Уладзімірава хрышчэння, якая сёння падзеленая на некалькі арганізацыйна цалкам незалежных канфесій, уключаючы УГКЦ і УАПЦ(а), бакі заклікалі сваіх вернікаў да стараннай малітвы за адзінства Цэркваў Кіеўскай традыцыі, паведамляе сайт УАПЦ(а).

З улікам таго, што Харкаўска-Палтаўская епархія УАПЦ выхад з вымушанай эклезіялагічнай ізаляцыі бачыць у еўхарыстычным і адміністрацыйным адзінстве з УГКЦ, што “не прадугледжвае частковага далучэння або падзелу часткі нейкай асобнай праваслаўнай Царквы”, бакі, узяўшы пад увагу вопыт праваслаўна-каталіцкага дыялогу на сусветным і мясцовым узроўнях, пачалі сумесны пошук мадэлі аднаўлення адзінай Памеснай Царквы ва Украіне.

Яны дамовіліся, падзяляючы тую ж веру, маючы тое ж разуменне Святых Тайн і ўлічваючы важную ролю біскупа Рыма ў стварэнні адзінства Царквы Хрыстовай, паглыбіць распачаты дыялог і засведчыць сваю жаданне канкрэтнымі рашэннямі бакоў. Прапановы, якія абмяркоўваліся падчас сустрэчы, плануецца прадставіць асобна Сіноду біскупаў УГКЦ і Епархіяльнаму сабору Харкаўска-Палтаўскай епархіі УАПЦ для іх далейшага зацвярджэння і ўкаранення.

У склад УАПЦ (а) уваходзіць 27 парафій на ўсходзе і ў цэнтры Украіны, а таксама адзін прыход у Маскве (Расія). Колькасць святароў — каля 30-і. Ва Украінскай Грэка-Каталіцкай Царкве 3765 парафій і каля 3300 святароў.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі