У епархіях Беларусі пройдуць сямейныя фестывалі ў гонар Пятра і Фяўронні

день семьиУ Гомелі 6 ліпеня на тэрыторыі праваслаўнага прыхода Перамянення Гасподняга прайшло свята ў гонар Дня сям’і, любові і вернасці – дня памяці святых Пятра і Фяўронні Мурамскіх, нябесных заступнікаў кахання і шлюбу.

Арганізатарам свята выступіў інфармацыйны аддзел Гомельскай епархіі, якім кіруе настаяцель храма Перамянення пратаіерэй Алег Кастрама. Ля прынесенага ў гэты дзень у храм абраза святых з частачкамі іх мошчаў пры збегу шматлікіх вернікаў была адслужаная Боская Літургія, святар ўручыў шматдзетным сем’ям букеты рамонкаў. Па заканчэнні богаслужбы адбыўся канцэрт, дзяўчыны праводзілі майстар-класы па вышыўцы, хлопцы – па разбярству па дрэве, прыхаджане маглі набыць упрыгожванні з пацерак, сувеніры з гліны, прымерыць вайсковую кальчугу, пачаставацца гарбатай. Прыхаджане з радасцю малявалі на тварах рамонкі, а ў канцы свята адбылося ўзнагароджанне пераможцаў конкурсу сямейнай фатаграфіі, паведамляе eparhiya.by.

8 ліпеня, у дзень малітоўнага шанавання святых, свята працягнецца ў гомельскім гарадскім парку. У Светлагорску ў гэты дзень гулянні пройдуць у парку Чатырох Стыхіяў, куды вернікі прыйдуць хросным ходам пасля Боскай Літургіі, якая пачнецца ў 18.30 у кафедральным саборы Нараджэння Найсвяцейшай Багародзіцы. Арганізатары свята – моладзевае брацтва Пятра і Фяўронні – падрыхтавалі праграму круглага стала пра сямейныя каштоўнасці, а таксама канцэртна-забаўляльную праграму, паведамляе sluck-eparchiya.by.

У гэты ж дзень Свята сям’і, любові і вернасці пройдзе ў аграгарадку Сар’я пад Верхнядзвінскам, дзе знаходзіцца храм Успення Найсвяцейшай Багародзіцы – у мінулым касцёл, збудаваны мясцовым землеўладальнікам Лапацінскім ў памяць аб рана памерлай малады жонцы. Удзел у свяце прымуць госці – артысты з Вілейкі і Верхнядзвінска, паведамляе eparhia992.by.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі