Таварыства аховы помнікаў: Месца Полацкай Сафіі – у Полацку

сафіяБеларускае добраахвотнае таварыства аховы помнікаў гісторыі і культуры падрыхтавала пратэстныя звароты з нагоды грамадскага абмеркавання перспектываў узвядзення ў Віцебску на вуліцы Чэхава Сафійскага сабора – копіі колішняй Полацкай Сафіі, пабудаванай у  XI стагоддзі. Грамадскае абмеркаванне, якое распачнецца 24 жніўня, з’яўляецца, на думку аўтараў зварота, цалкам незаконным, паколькі гутарка ідзе пра пабудову ў гістарычнай частцы горада.

На думку старшыні Таварыства Антона Астаповіча, ідэя пабудовы Сафійскага сабора ў гістарычным цэнтры супярэчыць беларускаму заканадаўству, якое не дазваляе ўзвядзенне ў гістарычнай застройцы аніякіх будынкаў, якія раней у ёй не прысутнічалі. “Заклікаем усіх неабыякавых падтрымаць напісаннем аналагічных зваротаў, каб прадухіліць чарговую прафанацыю ў дачыненні да беларускай гісторыка-культурнай спадчыны. Нагадваем, што грамадскае абмеркаванне, у тым выглядзе, у якім яно анансаванае, – незаконнае, бо парушаная працэдура яго арганізацыі”, – гаворыцца ў звароце, які прапануецца падпісаць кожнаму грамадзяніну. Тэкст зварота, а таксама адрасы, па якіх ён павінен быць накіраваны, знаходзіцца тут pomniki.budzma.org.

Таксама ініцыятары звароту не бачаць сэнсу ўзвядзення ў Віцебску копіі Полацкай Сафіі, якая, на іх думку, павінная належаць выключна полацкаму архітэктурнаму ландшафту.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі