Біскуп Яшэўскі правядзе па тры дні ў кожнай з даручаных яму парафіяў

встречаНовапрызначаны дапаможны біскуп Мінска-Магілёўскай архідыяцэзіі і біскупскі вікарый для Магілёва і Магілёўскай вобласці Аляксандр Яшэўскі SDB 24 верасня правёў першую нараду са святарамі даручанага яму рэгіёна. Удзел у сустрэчы ўзялі каталіцкія святары з Магілёва, Бабруйска, Касцюковічаў, Чавусаў, Крычава, Мсціслава, Шклова, Горак, а таксама манахіні з Кангрэгацыяў Сясцёр святога Дамiнiка і Мiсiянерак Святой Сям’i.

На пачатку сустрэчы пробаш касцюковіцкай парафіі кс. Андрэй Дялянскі, які з’яўляецца духоўнікам святароў Магілёўскай часткі архідыяцэзіі, правёў канферэнцыю на тэму духоўнай і чалавечай салідарнасці. «Мы прагнем, каб Магілёўшчына стала “райскім садам”. Але варта памятаць, што гэта будзе немагчыма, калі паміж намі, святарамі гэтай зямлі, не будзе святарскай еднасці і салідарнасці – духоўнай і чалавечай», – падкрэсліў святар, які мае найвялікшы досвед працы ў гэтым рэгёне, паведамляе mohylev-katolik.by.

Вельмі важнымі для святарскага жыцця кс. Андрэй Далянскі назваў «сустрэчы духавенства, радасць ад гэтых сустрэчаў, перажыванне парафіяльных святаў, сустрэчы за кавай і гарбатай, звычайныя адведзіны адзін аднаго».  «Аднак злы дух дзейнічае, разбіваючы святарскую еднасць. Напэўна, таму, на жаль, і ў нашай супольнасці не ўсё так добра, як хацелася б”, – зазначыў святар.

«Мы, душпастыры гэтай зямлі, нястомна павінныя памятаць аб тым, каб ўсе прэзбітэры, устаноўленыя праз сакрамэнт пасвячэння, былі звязаныя паміж сабою вельмі цесным сакрамэнтальным вузлом братэрства», – заклікаў кс. Далянскі.

Пасля духоўнай канферэнцыі адбылося выстаўленне Найсвяцейшага Сакрамэнту, святары і манахіні мелі магчымасць прыступіць да сакрамэнту пакаяння.

Святую Імшу ўзначаліў біскуп Аляксандр Яшэўскі SDB. У гаміліі іерарх заклікаў да сумленнасці і адказнасці. «Хто верны ў малых рэчах, той будзе верны і ў вялікіх”, – падкрэсліў герарх.

Пасля Эўхарыстыі адбыўся сумесны пачастунак і былі абмеркаваныя некаторыя душпастырскія справы, у т. л. было прынятае рашэнне аб тым, што ў лістападзе пачнецца інспекцыйная вандроўка герарха па дэканату. Наведванне кожнай з парафіяй будзе трываць тры дні: дзень камунікавання са святаром, дзень сустрэчы з вернікамі, дзень сустрэчаў з мясцовай уладай.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі