Кіраўнік сірыйскіх грэка-каталікоў: крызіс хрысціян Ірака і Сірыі дасягнуў біблейскіх маштабаў

Сірыйскі патрыярх Ігнацій Юсуф III Юнан, духоўны лідар 158 тыс. сірыйскіх каталікоў, заявіў, што крызіс бежанцаў з Ірака і Сірыі дасягнуў «біблейскіх маштабаў” і што ўцякаючыя хрысціяне моляць краіны Захаду выратаваць іх ад пераследаў экстрэмістаў.

Па словах іерарха, сітуацыя, якая існуе ў Іраку на працягу двух пакаленняў, а ў Сірыі – тры гады, з’яўляецца жахлівай.

«Крызіс нарастае па меры таго, як адбываецца ўсё больш забойстваў, усё больш людзей трапляе ў палон. Пачынаючы з падзення Мосула ў чэрвені 2014 ўсе хрысціянскія абшчыны на поўначы Ірака былі сцёртыя з твару Зямлі», – заявіў ён.

На думку патрыярха, ЗША і іншыя заходнія краіны адыгралі значную ролю ў зараджэнні дадзенага крызісу, зрынуўшы Садама Хусэйна ў 2003 годзе, а таму яны павінны прыняць у сябе ўцекачоў.

Ён таксама адзначыў, што хрысціяне тысячагоддзямі выжывалі ў цэнтры блізкаўсходняй цывілізацыі, аднак цяпер іх «заходнія браты і сёстры» павінны прыйсці ім на дапамогу.

Іншы царкоўны лідар Сірыі, мітрапаліт Жан-Клеман Жанбарт, заявіў, што зыход хрысціян з Блізкага Ўсходу носіць «апакаліптычны» характар. Паводле яго слоў, ён з’яўляецца свайго роду «дэпартацыяй, якая выракае нашу двухтысячагадовую Царкву на завяданне». Ён таксама выказаў сваю незадаволенасць з нагоды недастатковай дапамогі з боку заходніх краін, запытаўшы: «Якія яшчэ зверствы павінна здзейсніць ІДІЛ, перш чым свет паспрабуе спыніць забойцаў? Сірыйскія хрысціяне ў сур’ёзнай небяспецы – хутка мы можам зусім знікнуць ».

Па матэрыялах Christian Post.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі