Улады не пакідаюць спробаў заклікаць у войска рэчыцкага Сведку Іеговы

Кангрэс Сведкаў Іеговы 8

Рэчыцкі ваенкамат не пакідае спробаў заклікаць у войска мясцовага Сведку Іегову – 24-гадовага Дзмітрыя Чорбу, нягледзячы на тое, што супраць яго былі спыненыя ўзбуджаныя раней крымінальная і адміністратыўная справы. Усё гэта адбываецца менш чым за год да ўступлення ў моц 1 ліпеня 2016 года закона аб альтэрнатыўнай службе, які дазваляе не служыць у войску па рэлігійных прычынах.

25 верасня вернік прайшоў медагляд, які прызнаў яго годным да службы ў войску, але ён адмовіўся падпісваць даведку. Дзмітрый Чорба паведаміў, што ў ваенкамаце да яго ставіліся груба з-за таго, што ён выйграў узбуджаную супраць яго адміністратыўную справу, а таксама з-за яго пацыфісцкіх вераванняў як Сведкі Іеговы, паведамляе Forum18.

Прызыўнік адзначыў, што ў яго прысутнасці кіраўнік ваенкамату падпалкоўнік Уладзімір Осіпаў заявіў, што хоча пакараць яго, каб у будучым адмова ад прызыву не ўвайшла ў звычку.

Дзмітрый Чорба чакае, што пасля таго, як ён зноў не з’явіцца на прызыўны пункт, супраць яго зноў узбудзяць крымінальную справу па ч. 1 арт. 435 КК.

Чакае падобнага і Сведка Іеговы з Брэсту – Віктар Каліна, які таксама пераследваўся па ч. 1 арт. 435 КК, але 17 жніўня быў апраўданы судом Маскоўскага раёну горада. 13 кастрычніка Брэсцкі абласны суд адхіліў скаргу пракурора па гэтай справе. На яго думку, яго могуць зноў паклікаць у войска ўвесну 2016 года.

Прадстаўнікі рэчыцкага ваенкамату адмовіліся патлумачыць Forum18 сваю пазіцыю. У сваю чаргу прэс-сакратар  Мінабароны Уладзімір Макараў заявіў, што да ўступлення ў моц закона аб альтэрнатыўнай службе ніякага даравання ўхілістам не будзе.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі