Мінгандаль Беларусі ўзмоцніць кантроль за дакладнасцю рэкламы

зніжкі

Міністэрства гандлю Беларусі ўзмоцніць кантроль за дакладнасцю рэкламы, паведаміла 26 лістапада на прэс-канферэнцыі намеснік міністра Ірына Наркевіч. Паводле яе слоў, перш за ўсё ўвагу Мінгандлю зверне на інфармацыю аб кошце і ўласцівасцях тавараў і паслуг. Яна адзначыла, што падчас маштабных распродажаў гандаль паказвае завышаны працэнт зніжкі.

Таксама Мінгандлю разам з Міністэрствам аховы здароўя і МПЗ прапануе павялічыць штрафы за продаж сумніўных лекаў у інтэрнэце. Як распавяла намеснік міністра, у апошні час у там актывізаваліся прадаўцы лекавых сродкаў, якія прапануюць свабодна набыць, напрыклад, таблеткі, якія на самай справе можна адпускаць толькі па рэцэпце. Для юрыдычных асоб прапануецца прадугледзець штраф ад 40 да 200 базавых велічынь, для ІП – ад 30 да 100 БВ, фізічных асоб – ад 10 да 50 БВ, перадае БелТА.

Акрамя таго, Ірына Наркевіч заявіла, што рэклама на асфальце, якую ў апошні час усё часцей спрабуюць размяшчаць юрыдычныя асобы і ІП, незаконная. У стандарце вонкавай рэкламы ёсць палажэнне, якое не дапускае на паверхні дарожнага пакрыцця ніякай рэкламы, нагадала яна. Для дадатковага інфармавання гэтую забарону плануюць перанесці ў палажэнне аб размяшчэнні вонкавай рэкламы.

Міністэрства гандлю таксама выступае за абмежаванне рэкламы ў паштовых скрынях. У прыватнасці, прапануецца пазначыць адмысловымі налепкамі паштовыя скрыні жыхароў, якія не жадаюць яе атрымліваць. Адпаведны эксперымент па абмежаванні рэкламы плануюць правесці ў некаторых дамах Мінска.

Што тычыцца рэкламы канцэртаў, то тут прапануецца ўказваць ўзроставыя абмежаванні, каб абараніць дзяцей ад інфармацыі, якая можа прычыніць ім шкоду.

Разам з тым Мінгандлю не плануе ўвядзення нейкіх канцэптуальных зменаў і новых нормаў, каб не напалохаць бізнес, заявіла Ірына Наркевіч.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі