У савет Гродзенскай епархіі увайшоў святар – публіцыст і перакладчык

ройУ Гродне ў царкоўна-прыхадскім комплексе праваслаўнага Пакроўскага кафедральнага сабора 17 снежня адбыўся штогадовы сход духавенства Гродзенскай епархіі пад старшынствам архіепіскапа Гродзенскага і Ваўкавыскага Арцемія.

Уладыка Арцемій ў сваім дакладзе распавёў пра спецыфіку выклікаў сучаснасці і адпаведнае ім супрацьстаянне. Сакратар епархіі мітрафорны пратаіерэй Анатоль Ненартовіч выступіў са справаздачай па статыстычных дадзеных аб працы прыходаў і заклікаў духавенства больш уважліва весці справаводства, паведамляе orthos.org.

Падчас зацвярджэння епархіяльнага савета ў яго быў уведзены настаяцель Пакроўскага кафедральнага сабора Гродна пратаіерэй Георгій Рой, перакладчык і публіцыст, вядомы культуралагічным асветніцтвам.

У якасці асобнай структуры з місійна-катэхізатарскага аддзела былі выведзеныя місіянерскі аддзел і аддзел рэлігійнай адукацыі і катэхізацыі, кіраўнікамі якіх сталі іерэі Андрэй Наздрын і Ігар Данільчык.

У Слуцку пачатая падрыхтоўка да юбілею Сафіі Слуцкай

У гэты ж дзень у Слуцку пад старшынствам епіскапа Слуцкага і Салігорскага Антонія адбылося чарговае пашыранае пасяджэнне Епархіяльнага савета Слуцкай епархіі, да ўдзелу ў якім былі запрошаныя благачынныя Слуцкай епархіі і іх памочнікі, а таксама кіраўнікі епархіяльных аддзелаў, паведамляе sluck-eparchiya.by.

Падчас пасяджэння абмяркоўваліся пытанні падрыхтоўкі да намечанага на 25 снежня сходу духавенства Слуцкай епархіі. Таксама вырашаліся пытанні аб стварэнні епархіяльнага склада і аспектах працы паломніцкага аддзела.

Благачынным было даручана распрацаваць планы правядзення юбілейных мерапрыемстваў да святкавання 1 красавіка 430-годдзя з дня нараджэння святой Сафіі, княгіні Слуцкай.

Кіраўнік епархіяльнага аддзела па справах моладзі Павел Сяргееў агучыў план дабрачыннай акцыі «Каляды прыходзіць да кожнага».

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі