Папа Францішак хрысціў дзіця з Беларусі

хростПапа Францішак, згодна традыцыі, у свята Хросту Госпада 10 студзеня ўдзяляе сакрамэнт хросту дзецям супрацоўнікаў ватыканскіх структураў. Гэтым разам сярод ахрышчаных быў беларус – маленькі Арвід, сын супрацоўніка беларускай рэдакцыі Ватыканскага радыё Аляксандра Панчанкі.

Хрост адбыўся 10 студзеня ў Сікстынскай капэле падчас нядзельнай Святой Імшы, паведамляе catholic.by.

Папа Францішак ахрысціў 26 дзяцей, большасць якіх – з італьянскіх сем’яў. Таксама было ахрышчанае дзіця супрацоўніцы нямецкай рэдакцыі Ватыканскага радыё.

Каб атрымаць магчымасць ахрысціць дзіця праз паслугу Папы Францішка, бацькі звярнуліся ў Службу папскіх літургічных цэлебрацыяў, куды прадставілі звычайныя дакументы, неабходныя для хросту. Падрыхтоўку да хросту бацькі прайшлі ў парафіяльных катэхетаў па месцы жыхарства.

У якасці нябеснага апекуна для Арвіда абралі святога Яна Паўла ІІ, у гонар якога і было ахрышчанае немаўля.

«Цудоўна, што радасць нашай сям’і стала ў пэўным сэнсе агульным святам для Касцёла ў Беларусі», – кажа бацька Арвіда,  каментуючы вялікі розгалас гэтага хросту ў беларускіх каталіцкіх медыях.

«Хрост з рук Пантыфіка – вельмі важная падзея для любой сямейнай гісторыі, і, канешне, мы вельмі шчаслівыя, што атрымалі такую ласку ад Бога. Зараз будзем працягваць імкнуцца, каб згодна са словамі Папы вера стала галоўнай спадчынай, якую зможам перадаць сваім дзецям», – дадае Аляксандр.

З будучай жонкай – Аўшрай з Вільні – Аляксандр пазнаёміўся ў Літве на сустрэчы францішканскай моладзі, арганізаванай віленскімі бэрнардынамі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі