Баевікі ІДІЛ знішчылі найстаражытнейшы манастыр Ірака

Здымкі са спадарожнікаў пацвердзілі тое, чаго асцерагаліся царкоўныя іерархі і абаронцы помнікаў даўніны на Блізкім Усходзе: манастыр Святога Іллі, найстаражытнейшы манастыр Ірака, гісторыя якога налічвае 1400 гадоў, быў ператвораны баевікамі ІДІЛ у кучу абломкаў.

Манастыр, размешчаны каля Масула, налічваў 26 пакояў, уключаючы капліцу і санктуарый. Па сцвярджэнні аналітыкаў, манастыр быў разбураны ў прамежак паміж жніўнем і вераснем 2014 года. Для зносу выкарыстоўваліся бульдозеры і, хутчэй за ўсё, выбухоўка.

«Гісторыю хрысціян Масула па-варварску знішчаюць. Нас спрабуюць выгнаць з Ірака, знішчыць і выкараніць нашу прысутнасць на гэтай зямлі», – пракаментаваў здымкі каталіцкі святар Пол Табіт Хабіб, які пражывае ў горадзе Арбіл ў Іраку.

Пабудаваны ў 590 годзе манастыр ужо быў сведкам ганенняў. Так, у 1743 годзе 150 манахаў, якія адмовіліся прыняць іслам, былі пакараныя па загадзе персідскага генерала. У 2003 годзе дах манастыра быў праламаны вежай ад танка, іракская армія скідала там адходы, а амерыканскія дэсантнікі, першапачаткова не распазнаўшы каштоўнасць пабудовы, нанеслі на яе сцены свой дэвіз фарбай.

Манастыр Святога Іллі ўвайшоў у спіс ужо больш чым ста разрабаваных і знішчаных помнікаў гісторыі, шматлікіх мячэцяў, магільняў, свяцілішчаў і цэркваў. Старажытныя манументы Ніневіі, Пальміры і Хатры ляжаць у руінах. Музеі і бібліятэкі разрабаваны, кнігі спалены, творы мастацтва знішчаюцца або прадаюцца на чорным рынку.

Па матэрыялах Fox News

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі