Папа Францішак дазволіў абмываць на Вялікдзень ногі жанчынам

ногиПапа Францішак даручыў ватыканскай Кангрэгацыі Божага Культу і Дысцыпліны Сакрамэнтаў увесці змены ў прадпісанні адносна абраду абмывання ног падчас Імшы Вячэры Госпада ў велікодны Вялікі чацвер.

У спецыяльным дэкрэце дыкастэрыі нагадваецца, што гэтая літургічная практыка была ўведзеная ў 1955 годзе адначасова з рэформай Вялікага Тыдня дэкрэтам “Maxima Redemptionis nostrae mysteria”, які прадпісвае абмываць ногі дванаццаці мужчынам падчас Імшы Вячэры Госпада, дэманструючы такім чынам пакору і любоў Хрыста да сваіх вучняў, паведамляе Радыё Ватыкана.

У дэкрэце, апублікаваным 21 студзеня 2016 года, гаворыцца, што біскупы і святары запрашаюцца да наследавання Хрыста, Які “не для таго прыйшоў, каб Яму служылі, але каб служыць”.

Ініцыяваныя Папам Францішкам змены закліканыя “прадэманстраваць поўны сэнс абраду”. Калі раней рэкамендацыя, змешчаная ў рубрыках Рымскага Імшалу, казала, што, “прыслугоўваючыя прыводзяць выбраных мужчын…”, дык цяпер у ёй сказана – “прыслугоўваючыя прыводзяць выбраных з Божага народа…”.

У дакуменце тлумачыцца, што цяпер “душпастары могуць выбраць невялікую групу вернікаў, якая ўяўляе сабой разнастайнасць і адзінства кожнай часткі Божага народа” – цяпер гэтая група можа складацца як з мужчын, так і жанчын, з маладых і пажылых, са здаровых і хворых, з духавенства, манаскіх асобаў і свецкіх.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі