Дзецям з Кобрынскай спецшколы на Каляды прывезлі пастаноўкі прыхадскія тэатры

преступлениеУ Жабінцы 11 студзеня моладзевае брацтва ў гонар Свяціцеля Кірылы Тураўскага на чале з клірыкам праваслаўнага Пакроўскага храма іерэем Андрэем Петрусевічам ажыццявіла прэм’ерны паказ тэатральнай пастаноўкі па матывах п’есы Джона Патрыка «Каляднае злачынства, або Дарагая Марыя».

Гледачамі гісторыі пра тое, як дабрыня і міласэрнасць адзінокай наіўнай бабулькі змагла змяніць кампанію злодзеяў-кішэннікаў, сталі выкладчыкі і навучэнцы гарадскіх СШ № 1, № 2, № 3 і гарадскога ліцэя, паведамляе ekklisia.by.

У гэты ж дзень братчыкі павіншавалі са святам Божага Нараджэння навучэнцаў Кобрынскай спецыяльнай агульнаадукацыйнай школы-інтэрната.

Таксама ў Кобрынскай спецыяльнай агульнаадукацыйнай школе-інтэрнаце 13 студзеня прайшло каляднае свята, падрыхтаванае з дапамогай клірыка Аляксандра-Неўскага сабора пратаіерэя Аляксандра Дзятчука і прыхадскога сястрынтва ў гонар святой пакутніцы Таццяны.

Таксама на свята прыйшлі выхаванцы нядзельнай школы, якія граюць у прыхадскім тэатры. У гэты раз 17 юных актораў паказалі спектакль па творы Яўгена Шварца «Два браты».

У кобрынскім яслі-садку № 4 – адзіным у Брэсцкай вобласці, дзе ёсць група, якая працуе па праграме міністэрства адукацыі «Духоўна-маральнае выхаванне дашкольнікаў на праваслаўных традыцыях беларускага народа», прайшоў калядны ранішнік, на які прыйшоў клірык Аляксандра-Неўскага сабора іерэй Мікалай Качурка , які курыруе працу групы.

У Рэвяціцкай сельскай школе ў Бярозаўскім раёне 18 студзеня адбылася сустрэча навучэнцаў з пратаіерэем Пакроўскай царквы Васілём Шэлестам. Айцец Васіль распавёў хлопцам пра свята Хрышчэння Гасподняга і ўручыў падарункі ўдзельнікам творчага конкурсу «Прыгажосць Божага свету».

Дзеці і педагогі нядзельнай школы пры храме вялікапакутніцы Параскевы Пятніцы ў аграгарадку Чарнаўчыцы ў Брэсцкім раёне 23 студзеня наведалі Кобрынскі дзіцячы дом разам з настаяцелем Параскевінскага храма пратаіерэем Іаанам Кінчаком. Дзеці з Чарнаўчыцкай школы паказалі пастаноўку «Казка», а таксама ўручылі сабраныя вернікамі падарункі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі