Валанцёры ХПЕ акунулі ў калядную атмасферу выхаванцаў інтэрнатаў для дзяцей і дарослых

impreza

Прадстаўнікі сацыяльнага аддзела Намётавага служэння Беларусі і група валанцёраў з розных цэркваў хрысціян поўнага Евангелля адправіліся ў школу-інтэрнат Бабруйскага раёна, каб павіншаваць дзетак і падзяліцца радасцю Раства, «акунуць” дзяцей у калядную атмасферу.

Для гэтага была прыдуманая спецыяльная інтэрактыўная праграма, дзе можна было наведаць тры станцыі: пастухоў, мудрацоў і хлеў, у якім выхаванцы школы маглі пераапрануцца ў касцюмы Марыі і Язэпа і ўявіць сябе на іх месцы, перадае jesuschurch.by.

Калі гульня і прадстаўленне скончыліся, дзяцей чакаў салодкі стол, а потым ім уручылі падарункі.

Наступная паездка адбылася ў псіха-неўралагічны дарослы інтэрнат у Мінскім раёне. Яго насельнікі з удзячнасцю прымалі не толькі падарункі, але і кожнае сказанае са сцэны слова. У час размовы некаторыя з іх падыходзілі і прасілі памаліцца.

Адказная за служэнне Алёна Паўлоўская адзначыла, што ёй зусім не шкада сваіх выходных, выдаткаваных на паездкі. За ўвесь час ёй дапамагала больш за 50 чалавек з розных цэркваў. «Калі хто адчувае патрэбу рабіць нешта добрае для людзей, гэта – выдатна, і разам мы – сіла. Вельмі хочацца, каб у нашай краіне наогул не было дзіцячых дамоў, і ва ўсіх дзяцей былі любячыя клапатлівыя бацькі. Але пакуль што гэта немагчыма. Таму вялікі дзякуй тым, хто ўкладвае сваю душу і дабрыню ў людзей, якія засталіся адны», – заявіла яна, запрасіўшы ўсіх у паездкі ў дзіцячыя дамы і інтэрнаты.

Адвентысцкая абшчына Крычава сумесна з моладдзю царквы Магілёва падрыхтавала да Каляд святочную праграму, на якую запрасілі дзяцей і іх бацькоў. Свята прайшло ў раённым Цэнтры культуры. Увазе гасцей была прадстаўлена пастаноўка, якая расказвае пра нараджэнне немаўляці Ісуса, перадае Adventist.by.

Прагучалі калядныя песні, а па завяршэнні святочнай праграмы дзецям былі ўручаны падарункі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі