Севярынец: рашэнне ЕС – індульгенцыя для Лукашэнкі. Гайдукевіч: вельмі правільнае рашэнне

5 з'езд БХД_38
Сустаршыня БХД Павал Севярынец, каментуючы спыненне ЕЗ візавых абмежаванняў у дачыненні да чыноўнікаў Беларусі, заявіў, што гэта “індульгенцыя, якая адкрывае шлях да далейшай дзейнасці зла ў Беларусі”.

Сустаршыня БХД Павел Севярынец пракаментаваў спыненне ЕС візавых абмежаванняў у дачыненні да чыноўнікаў кіруючага рэжыму.

“Шкада, што еўрапейцы вырашылі заплюшчыць вочы на беззаконне, рэпрэсіі, фальшаванне выбараў, задушэнне нацыянальнай мовы і культуры, знішчэнне чалавечай годнасці ў самым сэрцы Еўропы. “Адпушчэнне грахоў”, праштампаванае сёння – гэта індульгенцыя, якая адчыняе шлях да далейшай дзейнасці зла ў Беларусі, – заявіў Павел Севярынец , паведамляе bchd.info.

“Цяпер Ярмошына можа нахабна рагатаць у твар як беларусам, так і замежнікам: з’елі! Не падавіліся! Цяпер Лукашэнка можа куражыцца і прадстаўляцца ў еўрапейскіх сталіцах “законным прэзідэнтам”, хаця беларускі народ яго не абіраў. Але ёсць Бог, і Ён усё бачыць. І ёсць беларусы, якіх гэта дастала да глыбіні душы. Праўда пераможа – рана ці позна. А за гэтую памылку, якую робіць сёння Еўропа, многім замежным палітыкам будзе проста сорамна”, – сказаў ён.

гайдукевіч (20)

Старшыня Ліберальна-дэмакратычнай партыі Беларусі Сяргей Гайдукевіч лічыць, што зняцце санкцый у дачыненні да Беларусі – “вельмі правільнае, аб’ектыўнае рашэнне, якое дасць магчымасць рухацца ў патрэбным для краіны напрамку і паслужыць умацаванню яе суверэнітэта”. Яго заява апублікавана на сайце партыі.

“Рашэнне Савета кіраўнікоў міністраў замежных спраў краін Еўрасаюза аб частковым зняцці санкцый у дачыненні да нашай краіны – гэта тое, чаго мы чакалі. Гэта вельмі правільнае, аб’ектыўнае стаўленне да Рэспублікі Беларусь. Самае галоўнае, што гэта дае магчымасць ўмацавання суверэнітэту Беларусі. Я ўдзячны еўрапейскім калегам за тое, што яны дапамагаюць умацоўваць наш суверэнітэт і даюць магчымасць рухацца ў тым напрамку, у якім жадаем і мы, і яны”, – сказаў Гайдукевіч.

Паводле яго слоў, зняцце санкцый, а значыць паляпшэнне адносін Беларусі і ЕС, нельга супрацьпастаўляць адносінам краіны з РФ. “Гэта ні ў якой меры не супярэчыць беларуска-расейскім узаемаадносiнам. Мы ўпэўненыя, што нашы расійскія партнёры таксама гэтаму рады”, – заявіў Гайдукевіч.

Як паведамляла Крыніца, Cавет міністраў Еўрасаюза 15 лютага вырашыў зняць санкцыі з Беларусі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі