У Гомелі на нараду прафесіяналаў сабраліся выкладчыкі нядзельных школаў

Сава Мажука
У Гомелі ў ніжнім храме Петрапаўлаўскага кафедральнага сабора 27 лютага сабраліся на прафесійную нараду больш за 40 выкладчыкаў нядзельных школаў праваслаўнай Гомельскай епархіі.

Звяртаючыся да ўдзельнікаў нарады, старшыня епархіяльнага аддзела рэлігійнай адукацыі і катэхізацыі протаіерэй Вадзім Качан нагадаў, што любы выкладчык, які праводзіць урок, павінен памятаць ключавы прынцып: “Любая сустрэча з дзецьмі, няхай гэта будзе ўрок, пазакласнае мерапрыемства ці агляд культурна-гістарычных цікавостак, павінна стацца крыніцай духоўна-маральнага выхавання”, паведамляе eparhiya.by.

Падчас нарады выкладчык прыхода Аляксандра Неўскага Ірына Ігнатовіч правяла адкрыты ўрок па тэме «Вялікі пост. Таямніца споведзі і прычасця». Протаіерэй Вадзім Качан распавёў аб досведзе правядзення сямейнага фэсту «Радавая памяць». Насельнік Мікольскага мужчынскага манастыра архімандрыт Сава (Мажука) распавёў аб досведзе правядзення “дзіцячай” Літургіі.

У Драгічыне створаць Цэнтр навучання выкладчыкаў нядзельных школ

У гэты ж дзень у Срэценскім храме ў Драгічыне прайшоў семінар для выкладчыкаў нядзельных школаў благачыння. Удзел у працы семінара ўзялі 25 выкладчыкаў, 9 з якіх – святары.

Семінар пачаўся практычным заняткам, падрыхтаваным Дар’яй Раманюк для групы дзяцей 12 гадоў на тэму «Прыпавесці Гасподнія». Падчас тэарэтычнай часткі семінара было прынятае рашэнне стварыць на базе Срэценскага храма Цэнтр навучання выкладчыкаў нядзельных школаў сельскіх прыходаў благачыння з правядзеннем выязных паказальных заняткаў, паведамляе ekklisia.by.

Протаіерэй Васіль Міхнавец з сяла Новая Папіна распавёў пра ўмовы выкладання ў прыходах, дзе няма школьнага класа, а ўзрост дзяцей у групе вар’іруецца ад 6 да 14 гадоў.

У завяршэнне протаіерэй Яўген Ліхота падкрэсліў, што задача навучання ў нядзельнай школе – не проста вывучыць Дзесяць запаведзяў, а выхаваць чалавека, які жыве ў згодзе з праваслаўнымі пастулатамі у кожным аспекце штодзённага жыцця.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
01.03.2016 Навіны цэркваў| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты