У Сеціве набірае папулярнасць ролік, як праваслаўныя святары чытаюць “Магутны Божа” (відэа)


У сацыяльных сетках пашыраецца відэа, на якім маладыя праваслаўныя святары з Гродна на беразе Нёмана ля Каложскай царквы чытаюць верш Наталлі Арсенневай “Магутны Божа”.

Ролік прадстаўлены на абвешчаны парталам TUT.BY  конкурс, прызам якога стануць 30 тамоў беларускай класікі. Партал прымеркаваў конкурс да Дня роднай мовы, кнігі прадаставіла выдавецтва «Папуры», паведамляе t-styl.info.

Гродзенскія святары вырашылі выйграць прыз, каб перадаць кнігі ў бібліятэку катэдральнага Пакроўскага сабора.

«”Магутны Божа” Наталлі Арсенневай у нас ведае на памяць кожны клірык. Асабліва тыя, хто спявае ў хоры. Ім ужо не першы год адкрываюць фестываль “Каложскі благавест”. Нам здалося, што ў нашых вуснах найбольш арганічна будзе глядзецца менавіта верш-малітва», – распавядае дыякан Дзмітрый Паўлюкевіч, якія чытае верш на відэа.

«Дзе ж яшчэ маліцца i чытаць пра Беларусь, як не ля Каложы – найстаражытнейшага храма нашай Радзімы», – дадае дыякан Дзмітрый Паўлюкевіч.

Дзмiтрыю Паўлюкевічу дапамаглі сваімі галасамі дыякан Аляксандр Калацкi, святар Віктар Калацкі і панамар Антось Федасееў. Здымаў ролік рэжысёр Аляксандр Ганец, заснавальнік гродзенскай кінастудыі «Акропаліс».

У сакавіку TUT.BY абвесціць пераможцаў конкурса.

Верш «Магутны Божа», напісаны паэткай і дзяячкай беларускага нацыянальнага руху Наталляй Арсенневай у 1943 годзе, стаў духоўным гімнам Беларусі.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі