Еўрасаюз прыняў умовы Эрдагана па ўцекачах

мігранты
Прэзідэнт Еўрапейскага савета Дональд Туск 18 сакавіка паведаміў пра тое, што падчас саміту па міграцыйным крызісе Турцыя і кіраўнікі ўрадаў краінаў-чальцоў Еўрасаюза ўзгаднілі сумесны план дзеянняў, прыняўшы вылучаныя дзесяццю днямі раней прапановы Эрдагана.

З гэтага часу ўсе нелегальныя мігранты, якія прыбылі ў Грэцыю з Турцыі, пасля 20 сакавіка будуць вернутыя назад. Турцыя заявіла, што фактычнае вяртанне ўцекачоў у Турцыю пачнецца 4 красавіка, паведамляе ВВС.

У абмен на кожнага сірыйца, вернутага ў Турцыю, ЕС абавязваецца прымаць грамадзяніна Сірыі, які ўжо знаходзіцца ў гэтай краіне.

“Спадзяюся, гэта пагадненне будзе заслугоўваць даверу, – кажа грэчаскі прэм’ер Алексіс Цыпрас. – Яно дазволіць скараціць або спыніць нелегальную высадку на грэчаскія выспы”.

Згодна з рашэннямі саміту, да 72 тысячаў сірыйскіх мігрантаў, якія знаходзяцца ў Турцыі, будуць размешчаныя ў краінах Еўрасаюза, а Турцыя атрымае шматмільярдную фінансавую дапамогу на размяшчэнне ўцекачоў унутры краіны.

Таксама будуць паскораныя перамовы аб прыёме Турцыі ў ЕС.

Па словах турэцкага прэм’ер-міністра Ахмета Давутаглу, рашэнне саміту можна называць гістарычным: “Сёння мы зразумелі, што Турцыя і ЕС маюць агульны лёс, агульныя выклікі і агульную будучыню”.

На сённяшні дзень каля сарака тысячаў мігрантаў застаюцца ў Грэцыі, не маючы магчымасці працягнуць шлях у краіны паўночнай Еўропы з-за закрыцця межаў Македоніяй і шэрагам балканскіх краінаў, а таксама Аўстрыяй.

Міністр унутраных справаў Грэцыі Панаёціс Курубліс параўнаў па ўмовах пражывання цэнтр часовага ўтрымання блізу грэцкага пасёлка Ідамені на мяжы з Македоніяй з канцлагерам часоў нацысцкай Германіі.

Міжнародныя праваабаронцы: Дамоўленасць ЕС і Турцыі бесчалавечная

Міжнародная праваабарончая арганізацыя “Amnesty International” назвала бесчалавечнымі ўзгодненыя напярэдадні на саміце ЕС прынцыпы вяртання ў Турцыю ўцекачоў, якія дабраліся да грэчаскіх выспаў, паведамляе politrussia.com.

мігранты
Як адзначыла дырэктар прадстаўніцтва “Amnesty International” пры Еўрасаюзе Іверна МакГоўан, “Еўрасаюз і лідэры Турцыі апусціліся да новага нізкага ўзроўню – сапраўднага гандлю людзьмі, несумленных і дробязных таргоў, далёкіх ад правоў і годнасці прадстаўнікоў аднаго з самых безабаронных народаў на планеце”.

У арганізацыі моцна занепакоеныя тым, што Еўрасаюз лічыць Турцыю бяспечнай краінай для размяшчэння мігрантаў. Праваабаронца адзначыла, што ў Турцыі да ўцекачоў ставяцца вельмі дрэнна, умовы іх утрымання жудасныя. Пры нязначнай правіннасці мігрантаў неадкладна высылаюць з краіны.

“Шмат хто з нас, якія выступаюць за справядлівасць, волю і годнасць, прыйшлі ў жах, даведаўшыся, што кожны сірыец, які рызыкаваў сваім жыццём у лядачай лодачцы, прыбыўшы ў Грэцыю, будзе высланы назад і абмяняны на іншага сірыйца, – кажа Іверна МакГоўан. – Гэта маральна непрымальнае рашэнне, бо гуманнасць на такіх умовах – гэта ніякай гуманнасці”.

Праваабаронцы таксама абвінавачваюць Эўрасаюз у цынічнай спробе купіць у Турцыі згоду на прыём уцекачоў за некалькі мільярдаў еўра і адмену візаў для яе грамадзянаў.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі