Актывісты Маладзечна супраць неэкалагічных свінакомплексаў

У Маладзечне прайшоў круглы стол з удзелам актывістаў палітычных і грамадскіх арганізацый, на якім ўдзельнікі выказалі свае адзінагалоснае абурэнне будаўніцтвам свінакомплексу на 100 тысяч галоў у раёне вёскі Соўлава Маладзечанскага раёна.

У мерапрыемстве ўзялі ўдзел эксперт-эколаг Уладзіслаў Юркоў, прадстаўнік ПЦ “Вясна” Алесь Капуцкі, каардынатары БХД Павел Пракаповіч і Раман Ганчароў, прадстаўнік руху “Экалагічны Пошуг” Павел Сяргей, прадстаўніца БСДП (Грамада) Нэлі Шлойда, прадстаўнік АГП Генадзь Фарына ды іншыя, паведамілі ў БХД.

Нягледзячы на шматлікія пратэсты грамадзян, будаўніцтва свінакомплекса ў сваім “эканамічным” варыянце не прыпыняецца і пагражае стаць экалагічнай праблемай для рэгіёна, вядомага сваімі некранутымі краявідамі і культурніцкімі мерапрыемствамі.

Як адзначыў каардынатар БХД па Мінскай вобласці Павел Пракаповіч: “Свінакомплекс сам па сабе – справа нядрэнная, але мы павінны забяспечыць экалагічную бяспеку. У Еўропе даўно ўжо адмовіліся ад практыкі будаўніцтва вялікіх свінакомплексаў, бо гэта пагражае сур’ёзнымі экалагічнымі наступствамі. Лепш бы пабудавалі 2 ці 3 свінакомплексы з найноўшымі тэхналогіямі, хай і дарагія, але якія б забяспечылі ўстойлівае развіцце рэгіёна. Прапанаваны праект распрацаваны выключна з інтарэсаў інвестара, экалагічная частка выдаткаў абсалютна недастатковая. Чаму ўлады дазволілі будаваць гэткага монстра ў адным з прыгажэйшых рэгіёнаў Беларусі і не патрабуюць ад інвестараў больш экалагічных варыянтаў? У пагоне за фінансавай выгодай беларускія ўлады гатовыя нішчыць навакольнае асяроддзе і здароўе грамадзян”.

Актывісты пагадзіліся каардынаваць працу па праблеме будаўніцтва неэкалагічнага свінакомплекса.

Нагадаем, 9 сакавіка Маладзечанскі райвыканкам прыняў рашэнне № 173 “Аб дазволе будаўніцтва аб’екта”, згодна з якім кампаніі “Велес-Міт” дазваляецца будаваць свінакомплекс на 100 тысяч галоў у год у раёне вёскі Соўлава Маладзечанскага раёна.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі