У сталіцы Сербіі прайшоў хрэсны ход за забарону абортаў

beograd

У цэнтры сталіцы Сербіі — Бялградзе — 7 красавіка, у свята Дабравешчання ў праваслаўнай традыцыі, прайшоў хрэсны ход за забарону абортаў, ініцыятарам якога выступіў Патрыярх Сербскі Ірыней.

Удзельнікі ходу тры разы абышлі Скупшчыуы — парламент Сербіі, пасля чаго арганізатар акцыі, лідар сербскага каардынацыйнага цэнтра Міжнароднага руху ў абарону дзяцей да нараджэння «За жыццё» Радойка Любічыч, уручыў петыцыю на імя старшыні Скупшчыны аб неабходнасці забароны абортаў у краіне, паведамляе sobor.by.

У гэты ж дзень у Сербскай акадэміі навук адкрылася навуковая канферэнцыя «Нараджальнасць або смерць Сербіі».

У Варшаве пратэставалі супраць ўзмацнення жорсткасці антыабортнага заканадаўства

У Варшаве каля будынка Сойма 3 красавіка прайшла акцыя пратэсту супраць патэнцыйнага ўзмацнення жорсткасці антыабортнага заканадаўства. Удзел у акцыі, арганізаванай партыяй «Разам», прынялі больш за дзве тысячы чалавек, паведамляе rdc.pl.Акцыі прайшлі таксама ў іншых гарадах.

Сёння праект аб узмацненні жорсткасці заканадаўства адносна абортаў, падрыхтаваны структурамі пралайф-руху, знаходзіцца на разглядзе ў Сойме. Разам з заканадаўчым праектам пралайферы падалі прашэнне аб рэгістрацыі камітэта антыабортнага руху. Для таго, каб такая структура была зарэгістраваная, неабходна сабраць сто тысяч подпісаў.

Канферэнцыя Каталіцкіх Біскупаў Польшчы выступіла з заявай, у якой кажа аб нязгодзе з любымі кампраміснымі рашэннямі адносна абортаў, бо жыццё чалавека абаронена запаведдзю «Не забі!» ад моманту нараджэння.

Старшыня польскай кансерватыўнай палітычнай партыі «Права і Справядлівасць» (ПіС) Яраслаў Качыньскі абвясціў пра сваю падтрымку ініцыятывы пралайфераў. Таксама ў абарону права на жыццё ненароджаных дзяцей выказалася прэм’ер Польшчы ад ПіС Беата Шыдла.

У Паўночнай Ірландыі прысуд дзяўчыне, якая здзейсніла аборт, палярызаваў грамадскасць

У Паўночнай Ірландыі дзяўчыну прысудзілі да трох месяцаў умоўнага зняволення за ўчыненне медыкаментознага аборту.

Дзяўчына зацяжарыла ў 19 гадоў і, не жадаючы нараджаць дзіця, купіла ў інтэрнэце абартыўныя таблеткі, а затым паклала абартаваны плод у пластыкавы пакет і аднесла на сметнік, дзе яго знайшлі суседзі, якія паведамілі аб сваёй знаходцы ў паліцыю. Узрост дзіцяці складаў ад 10 да 12 тыдняў, паведамляе брытанская газета «The Tablet».

Грамадскасць Ольстэра падзялілася ў ацэнцы гэтага прысуду. У той час як дырэктар мясцовага аддзялення «Міжнароднай амністыі» Патрык Карыган заяўляе, што гэты выпадак паказвае, што заканадаўчы забарона абортаў не перашкаджае жанчынам імкнуцца зрабіць аборт, актывісты руху «Пра-лайф» патрабуюць перагляду прысуду, палічыўшы яго занадта мяккім. Так, Бернадэт Сміт лічыць, што гэтак паблажлівы прысуд можа стварыць «небяспечны прэцэдэнт».

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі