Мітрапаліт Кандрусевіч: Дактрына Папы аб сям’і кажа аб жывым арганізме сужэнства, а не аб яго паталогіях

семья, Папа
Старшыня Канферэнцыі Каталіцкіх Біскупаў Беларусі мітрапаліт Тадэвуш Кандрусевіч выступіў з разгорнутым каментарам да Апостальскай адгартацыі «Amoris Laetitia» (“Радасць любові”) Папы Францішка, агучанай апоўдні 8 красавіка.

Папская адгартацыя выклікала шырокі грамадскі рэзананс як у рэлігійных, так і ў свецкіх колах, таму мітрапаліт Кандрусевіч нагадвае: гэтая дактрына, якая павінная ўспрымацца як афіцыйная пазіцыя Каталіцкай Царквы адносна пытанняў сям’і і шлюбу, сталася плёнам працы Сінода Біскупаў, паседжэнні якога праходзілі ў 2014 і 2015 гадах, паведамляе catholic.by.

Апостальская адгартацыя «Amoris Laetitia» ўяўляе сабой вельмі шырокі дакумент, які складаецца больш чым з 200 старонак. 325 яго параграфаў раздзеленыя на ўступ і дзевяць раздзелаў.

Найбольшую цікаўнасць, падкрэслівае арцыбіскуп Кандрусевіч, выклікае той момант, што, кажучы пра сучасныя праблемы інстытута сям’і, найперш пра тое, што многія каталікі жывуць у другім шлюбе, пакінуўшы першы сакраментальны шлюб, Папа заклікае, захоўваючы непарушнымі дактрынальныя нормы, “браць пад увагу канкрэтныя акалічнасці, гэта значыць, – ставіцца да іх з пазіцыі інкультурацыі, прынцыпы якой не могуць быць глабалізаваныя”.

Адзінства вучэння і дзеяння не перашкаджае існаванню розных спосабаў інтэрпрэтацыі асаблівых аспектаў вучэння і вынікаючых з гэтага наступстваў, – тлумачыць арцыбіскуп Кандрусевіч сутнасць Папскай адгартацыі. Таксама дактрына, агучаная пантыфікам, “заахвочвае сем’і адпаведна ацэньваць сужэнскі саюз” і прызначаная “быць знакам міласэрнасці і блізкасці там, дзе сямейнае жыццё не ажыццяўляецца належным чынам”.

Пазіцыя Каталіцкай Царквы застаецца непахіснай у асуджэнні рэчаіснасцяў сучаснага свету: «антынараджальнай ментальнасці», злоўжываннях да малагадовых, прыраўноўвання да сужэнства свабодных і гомасексуальных саюзаў, сурагатнага мацярынства, гендэрнай ідэалогіі.

“Перад абліччам гэтых і іншых праблемаў хрысціяне павінныя даваць радаснае сведчанне аб сакрамэнтальным сужэнстве, з любоўю ставіцца да тых, хто знаходзіцца ў складанай сітуацыі”, – тлумачыць мітрапаліт Кандрусевіч сутнасць адгартацыі, падкрэсліваючы, што Папа Францішак “разглядае справу сужэнскай любові як сяброўскай, якая шукае карысці бліжняга, разглядае яе асаблівасці і праблемы развіцця, а таксама пытанні, звязаныя з выхаваннем чалавечай чуллівасці”, і адначасова – як “плённай любові, якая выяўляецца ў адкрытасці на новае жыццё і яго прыняцці, усынаўленні дзяцей, а таксама шматдзетнасці і шматпакаленнасці”.

Арцыбіскуп Кандрусевіч акцэнтуе ўвагу на тым, што, звяртаючыся да святароў, Папа Францішак заклікае іх адпаведным чынам ставіцца да падрыхтоўкі маладых людзей да шлюбу, не ператвараючы місійныя заняткі ў “фабрыку курсаў”.

Асаблівую ўвагу пантыфік надзяляе неабходнасці памятаць аб тым, што “нават у сітуацыі разводу і новага несакрамэнтальнага сужэнскага саюзу сужэнкі застаюцца часткай Каталіцкай Царквы і не з’яўляюцца экскамунікаванымі”, больш за тое, у гэтых выпадках “пастулатам з’яўляецца іх суправаджэнне, у выпадку грамадзянскіх і нефармальных саюзаў неабходны дыялог з мэтай урэгулявання іх сітуацыі. Важны і прынцып ступеньчатасці, бо кожны чалавек развіваецца паволі праз паступовае пазнанне і прыняцце Божых дароў”.

“Кіруючыся прынцыпамі міласэрнасці, Папа заахвочвае не асуджаць такіх людзей без распазнання канкрэтнай сітуацыі і разумець іх цярпенні з мэтай дапамагчы ім адчуваць сябе не выключанымі з касцёльнай супольнасці праз удзел у яе жыцці, справы міласэрнасці, малітоўныя сустрэчы і іншыя душпастырскія ініцыятывы”, – тлумачыць іерарх.

“У гэтым працэсе асаблівая роля належыць душпастырам, каб з міласэрнасцю прымаць, суправаджаць і інтэграваць у касцёльную супольнасць асобаў, якія знаходзяцца ў складаных сітуацыях, дапамагаючы ім, згодна з вучэннем Касцёла і дырэктывамі біскупа, з патрабаваннямі евангельскай праўды і прапанаванай Каталіцкай Царквой любоўю”, – резюміруе заклік Папскай адгартацыі арцыбіскуп, дадаючы, што задача святара – “выхоўваць у людзей праўдзівае сумленне”.

“Апостальская адгартацыя Папы Францішка «Amoris Laetitia» з’яўляецца новым эвалюцыйным крокам у развіцці душпастырства сям’і і вырашэння яе крызісаў. Яна перад усім разважае аб жывым арганізме сужэнскага саюза, а не толькі аб яго паталогіях”, – упэўнены арцыбіскуп Кандрусевіч.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі