Працэс беатыфікацыі Эдварда Вайніловіча афіцыйна пачаўся

Красный костел
У Мінску ў Чырвоным касцёле 10 красавіка пачаўся беатыфікацыйны працэс Эдварда Вайніловіча – першы крок на шляху да кананізацыі.

Эдвард Вайніловіч увайшоў у гісторыю як палітычны, грамадскі дзеяч і заснавальнік Чырвонага касцёла. Раніцай 10 красавіка працэс адкрыўся Святой Імшой, падчас якой вернікі ўпершыню прачыталі спецыяльна складзеную і зацверджаную малітву да заступніцтва Эдварда Вайніловіча. На Імшы прысутнічалі прадстаўнікі іншых канфесіяў і рэлігій, якія вызнаюць жыхары Беларусі.

Каталіцкі святар з Мінска кс. Раман Факсінскі, прызначаны віцэ-пастулатарам на беатыфікацыйным працэсе Эдварда Вайніловіча, кажа, што такі працэс заўсёды выглядае не толькі як працэс праслаўлення, але і як судовы працэс: «На беатыфікацыйным працэсе адбываецца кананічнае расследванне адносна гераічнасці цнотаў кандыдата. Працэс праводзіцца Беатыфікацыйным Трыбуналам, які ўзначальваецца пастулатарам. Зараз гэта будзе ксёндз доктар Андрэй Сцомбэр, вельмі дасведчаны спецыяліст у кананічным праве, які быў дэлегатам біскупа ў працэсе Яна Паўла ІІ. Я з’яўляюся віцэ-пастулатарам, бо кс. Андрэй Сцомбэр не заўсёды зможа прысутнічаць на працэсе, які адбываецца ў нас, у Беларусі».

У беатыфікацыйным працэсе ўдзельнічаюць прадстаўнікі Польшчы, бо Эдвард Вайніловіч памёр у польскай Быдгошчы, і шматлікіх сведкаў другой ступені (тых, якія чулі сведчанні відавочцаў-сучаснікаў) будуць апытваць у Польшчы.

Першая сесія працэсу праводзіцца публічна — гэта прадстаўленне кандыдата і апісанне ягонага жыцця, усталяванне Трыбунала ўладай Мітрапаліта Мінска-Магілёўскага арцыбіскупа Тадэвуша Кандрусевіча.

Адначасова будуць створаныя дзве камісіі — тэалагічная і гістарычная. Тэалагічная камісія вывучае, наколькі словы чалавека адпавядалі вучэнню Каталіцкай Царквы і не ўтрымлівалі ерасі. Гістарычная камісія разглядае ўсе сведчанні пра жыццё і ўчынкі кандыдата.

Першы дзень працы беатыфікацыйнага працэса завершыцца працэсіяй да месца пахавання Эдварда Вайніловіча.

Цяпер Эвард Вайніловіч будзе звацца Слугой Божым.

Эдвард Вайніловіч нарадзіўся ў 1847 годзе ў Сляпянцы (цяпер у Мінску) у шляхецкай сям’і. У сваіх маёнтках займаўся арганізацыяй сельскагаспадарчай працы на падставе найноўшых дасягненняў у гэтай галіне. У 1883 годзе быў прызначаны ганаровым міравым суддзёй Слуцкага павета, а ў 1888 годзе выбраны віцэ-старшынёй Мінскага Таварыства Сельскай Гаспадаркі. Тройчы абіраўся ў расійскую Дзяржаўную Думу, быў членам Дзяржаўнага Савета Расіі ад Мінскай губерні. Адмовіўся ад прапанаванай пасады віцэ-міністра сельскай гаспадаркі Расійскай імперыі. Фінансаваў будаўніцтва каталіцкіх касцёлаў і праваслаўных цэркваў. Падтрымліваў беларускі нацыянальны рух, удзельнічаў у пасяджэннях Рады Беларускай Народнай Рэспублікі. У сувязі з рэвалюцыйнымі падзеямі быў вымушаны пакінуць Беларусь, памёр у 1928 годзе ў польскім Быдгашчы.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
10.04.2016 Навіны цэркваў| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты