У кандыдата Руху «За Свабоду» першая тысяча подпісаў

леван

Каманда фермера Вадзіма Левана, які ідзе пры падтрымцы Руху «За Свабоду» па Навагрудскай выбарчай акрузе, сабрала першую тысячу подпісаў выбарцаў. «Каманда — добрая. 12 чалавек працуюць, дзве брыгады па горадзе і па рэгіёнах. Гэта значыцца, што ў мяне подпісы не толькі з Навагрудка, але і з ваколіцаў», — сказаў сябра Руху «За Свабоду» Вадзім Леван сайту Pyx.by.

Па ягоных словах, і ў Навагрудку, і ў меншых населеных пунктах «нармальна падпісваюцца». «У сярэднім 5 подпісаў, 1 промах. Калі не хочуць падпісвацца, кажуць, што я малады, ці не ведаюць мяне», — адзначыў Леван.

«Астатнія чытаюць ліст з біяграфіяй, размаўляюць. Кажуць: „Фермер? Класна“, „Трое дзяцей? Класна“, чуюць пра „Народную праграму“, адзначаюць: „Мае праграму рэформаў? О, добра, хаця б нешта зменіцца“», — адзначыў сябра Руху «За Свабоду».

Пакуль што каманда Левана праводзіць у кожным мястэчку па дзве гадзіны з улікам пікетаў і паходу па дамах, але з панядзелка плануюць наладзіць вялікія пікеты па дню ў кожнай мясцовасці. З графікам вызначацца тады ж.

Бодзілеў: людзі кажуць пра свае праблемы і ставяць подпісы

8 ліпеня ў Магілёве прайшоў першы пікет па зборы подпісаў для вылучэння кандыдатам у дэпутаты мясцовага лідара МХД Андрэя Бодзілева.

“Актыўнасць насельніцтва і ўвага да выбараў пакуль невысокая, але ўсё ж людзі задаюць пытанні, размаўляюць, кажуць пра свае праблемы і ставяць подпісы”, – распавёў ён прэсавай службе БХД.

Між тым у Мінску, паведамляе прэс-служба БХД, на пікетах да прамоўцаў Беларускай хрысціянскай дэмакратыі выстройваюцца чэргі з жадаючых паставіць подпіс у іх падтрымку. Усе пікеты праходзяць пад бел-чырвона-белымі сцягамі.

“Вельмі добра людзі рэагуюць. У Менску людзі, калі бачаць бел-чырвона-белы сцяг, самі падыходзяць і ставяць подпісы. Некаторыя нават далучаюцца да назірання. Спадзяюся, што далучацца і да каманды”, – адзначыла адна з прамоўцаў БХД у Менску Вольга Кавалькова.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі