У магілёўскім касцёле па просьбе вернікаў адслужаць Імшу па-руску

высвячэнне біскупа_40

У магілёўскім касцёле Унебаўзяцця Найсвяцейшай Панны Марыі і святога Станіслава 2 кастрычніка будзе служыцца Святая Імша па-руску. З адпаведнай просьбай да дапаможнага біскупа Менска-Магілёўскай дыяцэзіі, адказнага за Магілёўскую вобласць, Аляксандра Яшэўскага SDB звярнуліся каля 20 вернікаў, якія сябе пазіцыянуюць менавіта як рускія і кажуць, што не разумеюць па-беларуску і па-польску.

Яны просяць мець магчымасць маліцца на мове, якую разумеюць. У каментары Krynica.info біскуп Аляксандр адзначыў, што каля месяца думаў над прапановай і ў выніку пагадзіўся ўключыць у расклад Святую Імшу на рускай мове. Пры гэтым ён падкрэсліў, што штучна яе існаванне ніхто падтрымліваць не будзе. Мінулая падобная спроба ў Магілёве доўга не праіснавала.

Суразмоўца таксама адзначыў, што 20 вернікаў – гэта даволі значная лічба для каталіцкай грамады Магілёўшчыны, дзе ў некаторых раёнах колькасць вернікаў можа ўсяго складаць пару дзясяткаў чалавек.

Нават пасля з’яўлення рускамоўнай Святой Імшы беларуская мова будзе пераважаць у магілёўскай катэдры, дзе ў нядзелю зараз цэлебруецца адна Імша на польскай мове і тры на беларускай.

Аляксандр Яшэўскі падкрэсліў, што Каталіцкі Касцёл з’яўляецца наднацыянальным і адкрытым для людзей розных моў і нацыянальнасцяў, яго задача – несці людзям веру. І таму Касцёл у Беларусі таксама адкрыты да просьбай людзей служыць Імшы на іх роднай мове.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі