7 лістапада беларусаў заклікаюць выйсці з абразамі новамучанікаў

7 лістапада ў Менску плануецца шэсце ад будынка КДБ да парку Чалюскінцаў. Акцыя прысвячаецца памяці ахвяраў НКВД-КДБ. Адпаведную заяву прадстаўнікі Правацэнтрысцкай кааліцыі перадалі 21 кастрычніка ў Менгарвыканкам.

Плануецца, што акцыя пачнецца 7 лістапада а 12-й ля будынка КДБ, дзе ўдзельнікі запаляць знічкі ў памяць аб тысячах закатаваных ахвяр у скляпеннях гэтага будынка. Плануецца, што да будынка КДБ удзельнікі акцыі прыйдуць з іконамі новамучанікаў, забітых НКУС-КДБ, і з партрэтамі рэпрасаваных.

Далей плануецца шэсце і жалобны мітынг у парку Чалюскінцаў, каля месца пахавання ахвяраў палітычных рэпрэсій.

“7 лістапада – трагічны дзень гісторыі Беларусі. Крывавая камуністычная рэвалюцыя прынесла нашаму народу масавы тэрор, знішчэнне цэркваў, расстрэлы і ссылкі. Святкавання 7 лістапада як дзяржаўнага свята Беларусі – нацыянальны сорам. Сёння памяць аб ахвярах знішчаецца, а катам нашага народу – Сталіну, Леніну, Дзяржынскаму ды іншым – стаяць помнікі. 7 лістапада мусіць стаць днём смутку і нацыянальнай жалобы па ахвярах камуністычных рэпрэсій, па людзям, закатаваным НКВД-КДБ. Замест гэтага зноў да помнікаў катам панясуць кветкі, адбудуцца “ўрачыстыя мерапрыемствы””, – адзначыў сустаршыня БХД Віталь Рымашэўскі.

“Лічу, нягледзячы на любыя вынікі адказу з выканкам, ушанаваць памяць ахвяр камунізму – наша грамадзянскае права і наш святы абавязак”, – падкрэсліў ён.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі