«Біблійнае таварыства» заклікала масава адсвяткаваць 500-годдзе Бібліі Скарыны

скорина

Міжканфесіянальнае хрысціянскае рэлігійнае брацтва “Біблійнае таварыства ў Рэспубліцы Беларусь” заклікала беларусаў, улады, дзеячаў адукацыі, навукі і культуры, а таксама СМІ актыўна ўдзельнічаць у свецкіх і царкоўных мерапрыемствах, якія ў 2017 годзе будуць прысвечаны 500-годдзю перакладу Бібліі першадрукаром і асветнікам Францыскам Скарынам.

У аргкамітэт уваходзяць старшыня “Біблійнага таварыства” Аляксандр Фірысюк і выканаўчы дырэктар Ігар Міхайлаў, протаіерэй Аляксей Васін з Беларускай Праваслаўнай Царквы, айцец Аляксандр Фаміных ад Рымска-Каталіцкай Царквы, Сяргей Паднюк з Аб’яднанай Царквы Хрысціян Веры Евангельскай, Віктар Яравы з Канферэнцыі Хрысціян-Адвентыстаў Сёмага Дня і Пётр Назараў ад Саюза Евангельскіх Хрысціян-Баптыстаў.

Яны нагадалі, што Біблія Скарыны стала “першай друкаванай беларускай кнігай”, ад якой вядзе сваё летазлічэнне беларускае кнігадрукаванне. “Пачынаючы з часоў Францыска Скарыны менавіта Біблія стала адным з галоўных сімвалаў нашай мовы, культуры, сімвалам нашага народа”, – гаворыцца ў звароце, перадае БелаПАН.

Аўтары звароту адзначаюць, што менавіта выданні Бібліі прывялі ў XVI стагоддзі да значнага “ўздыму ва ўсіх сферах грамадскага, палітычнага, эканамічнага і культурнага жыцця” Беларусі, паўплывалі «на змест выдатнага помніка беларускай прававой думкі – Статута Вялікага Княства Літоўскага», на працягу стагоддзяў фармавалі культуру і народ.

Яны падкрэсліваюць, што юбілеі, звязаныя з біблійнымі перакладамі і выданнямі Францыска Скарыны, адзначаюцца пастаянна і сведчаць аб агульнанацыянальным прызнанні іх вызначальнага ўплыву на гісторыю Беларусі.

Лейтматывам юбілейных урачыстасцяў 500-годдзя беларускага кнігадрукавання яны прапануюць «зрабіць важнасць перакладу і выдання менавіта Бібліі – кнігі, якая можа змяніць жыццё, дае веру і паказвае шлях да вечнага жыцця, падрыхтоўкай да якога з’яўляецца наш зямны шлях».

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
01.11.2016 Грамадства| Тэгі: , , , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты