У Віцебскай каталіцкай дыяцэзіі абралі найлепшыя батлейкі (фотарэпартаж)

Конкурс каталіцкіх парафіяльных калядных батлеечных спектакляў, якія адбыўся 5 студзеня ў Віцебску ў межах Дзён хрысціянскай культуры, прайшоў, насуперак устойлівай традыцыі дзіцячых самадзейных конкурсаў, без пакрыўджаных і незаўважаных.

конкурс
Акрамя пераможцаў  і дыпламантаў, падарункі “ад біскупа” атрымалі ўсе дзеці, якія прыйшлі ў катэдральны касцёл Езуса Міласэрнага на заключнае свята, у тым ліку, гледачы, – некаторыя парафіі, дзе пакуль няма трупы ці хора, прыехалі проста паглядзець. У выніку, раздаўшы акторам падарункі ад “Карытас”, біскуп Віцебскі запрасіў на салодкі пачастунак усіх дзяцей, якія былі ў касцёле.

Першае, два другія і тры трэція месцы – такую схему прапанавала журы, якое складалася з актораў Коласаўскага тэатра. Акторы, між іншым, прапанавалі асобна адзначыць дзяцей, талент якіх выйшаў за межы каляднай пастаноўкі і выклікаў у гледачоў цалкам шчырыя незапланаваныя эмоцыі. У выніку самыя яркія акторы – чацвёра малых з Паставаў – атрымалі дадатковыя авацыі ад удзячнай публікі.

конкурс
Асобныя дыпломы атрымалі ўсе парафіі, бо кожная прывезла сваё “моцнае месца” – кідкія вялікія дэкарацыі, нечакана глыбокі сэнс, запамінальныя касцюмы альбо выразны аўтарскі ўдзел святара ў стварэнні сцэнара і пастаноўкі, як гэта адбылося ў выпадку парафіі з Ідолты, душпастыр якой, кс. Вячаслаў Пялінак, паказаў намаганнямі дзяцей з маленькай вёсачкі на латвійскім памежжы прыгожую містэрыю пра шматаблічнасць шчасця.

конкурс
Яркай падзеяй свята сталі выступы двух калектываў з Дуброўны, якія прывезлі класічныя лялечныя тэатры. Юныя каталікі з маладой усходняй парафіі паслядоўна адраджаюць старадаўняе мастацтва лялечных п’есаў, вырабляючы ўнікальныя лялькі і ствараючы цікавыя сцэнары.

конкурс
Усім канкурсантам, прыехаўшым у Віцебск на свята батлейкі, прапаноўвалася ўкласціся ў жорскія межы па часе, да таго ж паказаць пастаноўку з актуальным зместам, адпрэчыўшы традыцыйныя ўзоры калядавання. Дзеці з Лынтупаў перанеслі калядныя матывы ў краму “Еўраопт”, дзе мітусяцца людзі, рыхтуючыся да свята, юныя вернікі адной з віцебскіх парафіяў – у бедную сялянскую хату з відавочнай нястачай прысмакаў, акторы з Паставаў – у сучасную мадэрновую сям’ю, дзе маці занурылася ў ёгу, а бацька – у тэлевізар, цалкам ігнаруючы паведамленне дзіцяці аб тым, што вось-вось народзіцца Хрыстос.

конкурс
Дзеці з Полацка паказалі адваротны бок Нараджэння Хрыстова, перанесшы дзею ў адну з Віфлеемскіх гасцініцаў, дзе Марыі і Язэпу не хапіла месца. Наваполацкія артысты давялі пластыкай і музыкай сувязь паміж гісторыяй Нараджэння, якое адбылося больш за дзве тысячы гадоў таму, і цяпершаняй штодзённасцю, у якой жывуць самыя звычайныя людзі.

Шквал авацыяў сабрала пастаноўка катэдральнага касцёла Езуса Міласэрнага. Нескладаная “казка” нагадала пра тое, што шлях да Бога ляжыць праз цалкам матэрыяльныя добрыя справы, а “белыя людзі”, у адрозненне ад жыхароў Афрыкі ці Усходу, ідуць да Яго павольнейшымі тэмпамі, гандлюючыся – цалкам ці напалову аддаваць сябе справам веры.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
06.01.2017 Навіны цэркваў, Фотарэпартаж| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты