Мітрапаліт Кандрусевіч у Вялікі Чацвер: Абмыўшы ногі вучням, Ісус перакуліў п’едэсталы

Четверг
Мітрапаліт Мінска-Магілёўскі арцыбіскуп Тадэвуш Кандрусевіч 13 красавіка ўзначаліў Імшу Вячэры Пана ў мінскім архікатэдральным касцёле Імя Найсвяцейшай Панны Марыі.

За Імшой Вялікага Чацвера, якой распачынаецца велікодны Трыдуум, мітрапаліту Кандрусевічу саслужыў дапаможны біскуп архідыяцэзіі Юрый Касабуцкі, паведамляе catholic.by.

Падчас Імшы мітрапаліт Кандрусевіч абмыў ногі 12-і мужчынам, гэты абрад сімвалізуе служэнне і любоў Хрыста, Які прыйшоў не дзеля таго, каб Яму служылі, але дзеля таго, каб служыць іншым.

У гаміліі арцыбіскуп Кандрусевіч разважаў пра абставіны пакутніцкай смерці святога Пятра і пра егіпецкі абеліск, які стаіць на плошчы святога Пятра ў Рыме, нагадаўшы, што гэты абеліск мог быць апошняй выявай, якую святы Пётр бачыў перад смерцю.

«На верхавіне абеліска сёння знаходзіцца крыж з надпісам Christus vincit, Christus regnat, Christus imperat. Надпіс нагадвае пра перамогу Езуса, якая была дасягнута дзякуючы Яго крыжу», – апавёў мітрапаліт, нагадаўшы: “Ісус становіцца на калені перад апосталамі і абмывае ім ногі. У пыльным клімаце Палестыны абмыванне ног было агульнапрынятым звычаем. Аднак гэта была праца слугі, ніколі гэтага не рабіў гаспадар дому. У жэсце Ісуса мы бачым нешта зусім іншае, не звычайнае для культуры таго часу. Ісус, які называў сябе настаўнікам, займае месца слугі і абмывае ногі сваім вучням. Гэта момант, калі прывычны свет перакуліўся з ног на галаву, і быццам усе абеліскі свету пападалі са сваіх п’едэсталаў».

«Абмыванне ног – гэта не інсцэніроўка мінулай гістарычнай падзеі, а ўдзел у збаўчай місіі Хрыста, якую Ён здзейсняе праз свой Касцёл у рэальным свеце», – патлумачыў мітрапаліт Тадэвуш Кандрусевіч напачатку рытуальна абмывання ног вернікаў.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі