Грэка-каталікі нагадалі жыхарам Полацка пра 500 гадоў Бібліі Скарыны (фотарэпартаж)

Уваходам у Полацк 15 ліпеня з малітоўным спевам завяршылася XXIIІ грэка-каталіцкая пілігрымка Віцебск-Полацк.

София
Пілігрымка прайшла пад дэвізам ад Францішка Скарыны з выдадзенай ім 500 гадоў таму Бібліі на беларускай мове: «Людемъ посполитымъ к доброму научению».

Да грэка-каталікоў з розных гарадоў Беларусі далучыліся манахі-базыляне з Украіны, якія адмыслова ўзялі ўдзел у пілігрымцы, каб ушанаваць гістарычную спадчыну свайго ордэна, дзейнасць якога некалі рэалізоўвалася на Віцебшчыне.

Цягам пяці дзён, ідучы праз амаль няспынны дождж, пілігрымы маліліся словамі малітваў, складзеных Францішкам Скарынам.

Кожны дзень пілігрымкі быў прысвечаны адмысловым развагам: «Праслаўляем Імя Ісуса», «Пакланяемся Крыжу Госпада», «Узвялічваем Маці Госпада», «Ушаноўваем апосталаў і сведкаў веры», «Дзякуем Богу за бацькоў у веры».

София
Адразу па ўваходзе  ў горад грэка-каталікоў у саколках з надпісам “500 гадоў беларускай Бібліі”  прывіталі вернікі мясцовай супольнасці праваслаўных-стараабрадцаў, духоўны кіраўнік якіх Пётр Арлоў традыцыйна паклапаціўся пра гарбату і пасілак для шматлікіх гасцей.

Па цэнтральных вуліцах горада вернікі скіраваліся да Полацкай Сафіі – месца, дзе былі закатаваныя манахі-грэка-каталікі і ў якім цяпер немагчыма зладзіць набажэнства, бо сабор з’яўляецца музеем. Набажэнства, якое ўзначаліў настаяцель полацкай парафіі святога Язафата Кунцэвіча а. Аляксандр Шаўцоў, адбылося проста ля муроў Сафіі.

Наступным ранкам у полацкай царкве святой Параскевы адбылася заключная ўрачыстая Боская Літургія, якую ўзначаліў Апостальскі візітатар для грэка-каталікоў Беларусі архімандрыт Сяргей Гаек.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
16.07.2017 Навіны цэркваў, Фотарэпартаж| Тэгі: , , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты