У Мінску адбылася інаўгурацыя каталіцкага капітула (фотарэпартаж)

12 верасня ў мінскім архікатэдральным касцёле прайшла цырымонія інаўгурацыі катэдральнага капітула cвятога Арханёла Міхала і Маці Божай Будслаўскай. Падчас цырымоніі яго члены – грэміяльныя і ганаровыя канонікі – склалі прысягу, а грэміяльныя канонікі атрымалі асаблівыя знакі адрознення – сімвалічныя пярсцёнкі і крыжы.

Катэдральны капітул Мінска-Магілёўскай архідыяцэзіі заснаваны 13 красавіка. У яго склад прызначаныя 8 грэміяльных і 10 ганаровых канонікаў, якія атрымалі такім чынам асаблівую адзнаку і прызнанне заслуг перад дыяцэзіяй. Да функцый капітула належаць дапамога біскупу, удзел у найбольш урачыстых цэлебрацыях у катэдральным касцёле ў Мінску і ў іншых месцах архідыяцэзіі, арганізацыя ў катэдральным касцёле канферэнцый і сімпозіумаў, прысвечаных дакументам Папы Рымскага і Ватыкана, паглыбленне культу святога Арханёла Міхала і Маці Божай Будслаўскай, дапамога Мітрапаліту Мінска-Магілёўскаму, забеспячэнне вернікам магчымасці прыступаць да сакрамэнту пакаяння праз дзейнасць каноніка пенітэнцыярыя.

Урачыстую святую Імшу ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч, які нагадаў, што капітул канонікаў мінскай катэдры існаваў яшчэ перад Кастрычніцкай рэвалюцыяй, аднак з-за пераследу перастаў існаваць. Паводле яго, інаўгурацыя катэдральнага капітула з’яўляецца знакам адраджэння Касцёла і яго прызнання Ватыканам, а таксама знакам прызнання заслуг прызначаных у яго канонікаў.

Апроч таго, падчас гэтай жа Святой Імшы вернікі парафіі, якія ў мінулым годзе заснавалі свае сем’і,  аднавілі сужэнскія абяцанні. «Сям’я – гэта галоўная клетка грамадства і яго фундамент. Якой яна будзе, такім будзе і грамадства», – падкрэсліў мітрапаліт.

Фота Paval Hadzinski

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
13.09.2017 Навіны цэркваў, Фотарэпартаж| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты