Удзельнікі пасяджэння Рады канферэнцый біскупаў Еўропы ў Мінску сустрэнуцца з Лукашэнкам

Catholic-Bishops

З 27 верасня па 1 кастрычніка ў Мінску будзе праходзіць пленарнае пасяджэнне Рады канферэнцый біскупаў Еўропы (РКБЕ). У Беларусі форум, які адбудзецца па запрашэнні  арцыбіскупа Тадэвуша Кандрусевіча, Мітрапаліта Мінска-Магілёўскага, пройдзе ўпершыню.

У асамблеі, прысвечанай пытанням моладзі і Еўропы як супольнага дома, прымуць удзел кіраўнікі біскупскіх канферэнцый з 45 краін, паведамілі Krynica.info ў інфармацыйнай службе Канферэнцыі каталіцкіх біскупаў Беларусі.

У межах форуму прадугледжана сустрэча іерархаў з прэзідэнтам Беларусі Аляксандрам Лукашэнкам (28 верасня), прэс-канферэнцыя ў гарадской Ратушы (28 верасня), наведванне некаторых парафій Мінска і сустрэча з мясцовымі вернікамі (1 кастрычніка).

Вынікам пленарнага пасяджэння стане заключны дакумент, які будзе агучаны 30 верасня ў касцёле Найсвяцейшай Тройцы (святога Роха) на Залатой Горцы ў Мінску. Змест гэтага дакумента будзе ўзяты пад увагу пры падрыхтоўцы да наступнага Сіноду Біскупаў па пытаннях моладзі, які пройдзе ў Рыме ў жніўні 2018 года.

Рада Канферэнцый Біскупаў Еўропы (РКБЕ) — орган зносін, сінадальнасці і супрацоўніцтва. Разам з Праваслаўнымі Цэрквамі РКБЕ два разы на год арганізоўвае Еўрапейскі каталіцка-праваслаўны форум для абмеркавання антрапалагічных і пастырскіх пытанняў дзеля вызначэння сумесных пазіцый па сацыяльных і этычных пытаннях.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі