Верніку з Ліды далі год “хіміі” на надпіс “сатана” на помніку Леніну

Ленин в Лиде
Праваабарончы цэнтр “Вясна” 21 верасня паведаміў аб пераследзе верніка з Ліды Мікалая Мякшылы, асуджанага да года абмежавання волі за спробу нанясення надпісу “сатана” на гарадскі помнік Леніну.

У першы раз, як паведаміў сам Мікалай Мякшыла, ён зрабіў такі ж самы надпіс на помніку ў сакавіку, яго амаль адразу выцерлі камунальныя службы. Напрыканцы красавіка Мякшыла вырашыў нанесці надпіс ізноў, каб выказаць сутнасць палітыкі, якую праводзіў Уладзімір Ленін датычна рэлігіі і вернікаў, паведамляе “Вясна”.

Нанесці надпіс у Мякшылы не атрымалася: у момант, калі ён наблізіўся да помніка і хацеў пачаць маляваць, да яго падбеглі людзі ў цывільным, павалілі на газон і пачалі збіваць, наступіўшы на патыліцу.

Збіўшы Мякшылу, на яго надзелі кайданкі і ў спецтранспарце даставілі ў РУУС.

Праз трое сутак папярэдняга зняволення затрыманага перавялі ў Гродзенскае СІЗА, прад’явіўшы абвінавачванне па арт. 339 КК «Хуліганства». У доме быў зроблены ператрус з канфіскацыяй кампутара. Праз два месяцы следства справу перадалі ў суд, які задаволіў просьбу пракурора аб годзе абмежавання волі.

Мякшыла абскардзіў рашэнне суда, аднак Гродзенскі абласны суд пакінуў скаргу без задавальнення, зараз зняволены абскардзіць рашэнне суда ў парадку нагляду.

Юрыст Праваабарончага цэнтра “Вясна” Павел Сапелка адзначае, што дадзены выпадак з’яўляецца відавочным парушэннем свабоды выказвання меркавання, бо рэакцыя ўладаў апынулася цалкам непрапарцыйнай зробленаму: ”У Крымінальным кодэксе ёсць артыкул, які прадугледжвае адказнасць за нанясенне надпісаў на будынках і збудаваннях; віды і памеры пакарання ў ім прадугледжаныя значна больш мяккія, па ім заключэнне пад варту немагчымае”.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
21.09.2017 Грамадства| Тэгі: , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты