Венгерскі эксперт: У выпадку аб’яўлення Каталоніяй незалежнасці яе можа чакаць лёс Косава

Каталония
У выпадку аб’явы Каталоніяй незалежнасці ў аднабаковым парадку яе можа чакаць лёс Косава, – пра гэта ў каментары карэспандэнту Krynica.info заявіў старэйшы навуковы супрацоўнік Інстытута замежных справаў і гандлю Венгрыі Шандор Дзьюла Надзь, які спецыялізуецца на іспанамоўных краінах.

На яго думку, Іспанія прыме ўсе магчымыя меры, у тым ліку, ваенныя, дзеля таго, каб прадухіліць аддзяленне Каталоніі.

“Мы ўбачым больш крывавыя кадры ў параўнанні з тым, што ўжо бачылі. І гэта не азначае, што Іспанія адпусьціць Каталонію”, – сказаў ён.

“Гэта азначае, што міжнародныя перспектывы Каталоніі будуць падобныя на тыя, як зараз у Косава. Савет Бяспекі ААН відавочна не прызнае яе. Ні Вялікабрытанія, ні Францыя, ні Кітай, ні Расія не хочуць падобнага прэцэдэнту аднабаковага абвяшчэння незалежнасці ад такой буйной краіны, – падкрэсліў эксперт.

“Калі незалежнасць Каталоніі будзе аб’яўленая, то ў бліжэйшыя гады яна сутыкнецца са значным эканамічным крызісам. У іх не будзе доступу да адзінага рынку, а таксама да іспанскага рынку. Відавочна, што вырабленыя ў Каталоніі тавары будуць байкатавацца. Большасць міжнародных кампаній, офісы якіх размешчаныя у Барселоне, пакінуць яе. Турысты таксама не паедуць у рэгіён, дзе адбываюцца беспарадкі і сутыкненні, ім лягчэй паехаць на поўнач у Францыю або на поўдзень у Іспанію. Большасць еўрапейскіх краінаў не прызнае Каталонію, з ёй не будуць ладзіцца прамыя авіязносіны. Акрамя таго, людзі, якія наведалі Каталонію, не змогуць больш са сваім пашпартам наведаць Іспанію. Гэта азначае, што ў бліжэйшы час прамысловасць Каталоніі абрынецца, а сама яна сутыкнецца са значным эканамічным крызісам”, – дадаў Шандор Надзь.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі