Упершыню за стагоддзе ў Віцебску адкрылі новую сінагогу

5D18D9E5-23A7-43A0-A383-7D52294B84A0_w650_r0_s

17 кастрычніка ўпершыню за 100 гадоў у Віцебску адкрылася новая сінагога. Будынак, дзе апошнія 25 гадоў маліліся віцебскія габрэі, быў звычайным жылым домам, які не мог выконваць усіх належных функцыяў, паведамляе Радыё Свабода.

Таму патрэба ў новым, спецыялізаваным будынку была вельмі вострая, кажа кіраўнік віцебскай юдэйскай рэлігійнай грамады Леанід Томчын:

«У Віцебску на пачатку мінулага стагоддзя габрэі складалі больш за палову насельніцтва, 100 гадоў таму тут функцыянавалі 64 сінагогі. Сёння ў нашай грамадзе каля 50 чалавек, але на адкрыццё прыйшло значна больш людзей. Я спадзяюся, што новая сінагога стане цэнтрам гарадскога габрэйскага жыцця. Цяпер у нас з’явіліся больш шырокія магчымасці не толькі для таго, каб маліцца ў традыцыях продкаў — у новым будынку прадугледжаныя і навучальныя класы, і пакоі для гасцей. Мы плануем стварыць тут і музей габрэйскага побыту. Пры тым мы не адмаўляемся і ад старога нашага будынку: цяпер мы займелі цэлы комплекс, які змогуць наведваць усе ахвотныя».

Цырымонія адкрыцця пачалася з сімвалічнага шэсця ад старога будынка да новага. Мужчыны сталага веку, паклаўшы рукі адзін аднаму на плечы, прайшлі да новай сінагогі, і тут да іх далучыліся хлопчыкі — як увасабленне пераемнасці традыцыі. Усім гасцям і мінакам уручалі паветраныя шарыкі, якія потым паляцелі ў неба.

На адкрыццё запрасілі прадстаўнікоў габрэйскіх арганізацый з Расеі і іншых краін. Прысутнічалі святары праваслаўнай і каталіцкай канфесій, у тым ліку каталіцкі біскуп Віцебскі Алег Буткевіч. Ад імя мясцовых уладаў віцебскіх вернікаў-юдэяў павіншаваў дарадца старшыні аблвыканкаму Міхаіл Даніленка.

Афіцыйная частка каля брамы новай сінагогі была нядоўгая. Пасля кароткіх прамоваў урачыста перарэзалі чырвоную стужку і ўсіх запрасілі ўсярэдзіну. Ганаровыя госці прымацавалі пры дзвярах мезузы — фрагменты адмысловай малітвы, запісаныя на пергаменце і схаваныя ў дэкаратыўныя футаралы. Хто ўваходзіць у сінагогу, дакранаецца да мезузы на знак пашаны.

Усе наведнікі маглі пераканацца, што новая сінагога ня толькі знадворку вылучаецца незвычайным дызайнам. Унутры таксама ўсё выканана ў сучасным стылі, і пры тым з улікам традыцый. Так, у новай сінагозе ёсць адмысловы рытуальны басейн — міква. Для жанчын, якія павінны маліцца асобна, прадугледжаны гаўбец у малельнай залі. З яго добра відаць і акно з шасціканцовай зоркай, і столь з «прыступкамі», якая нагадвае шацёр.

У аздабленні сінагогі «Давідаў шацёр» ёсць і матыў, звязаны з Віцебскам: сцяну, якая аддзяляе малітоўную залю ад гаўбца для жанчын, упрыгожваюць 12 копій з вітражоў Марка Шагала «Дванаццаць каленаў Ізраілевых», зробленыя на адмысловых стэндах з падсвятленнем.

Працы ў сінагозе яшчэ не скончаныя: у некаторых памяшканнях няма мэблі, не вызначана пакуль, дзе размесціцца анансаваны музей габрэйскага побыту.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
18.10.2017 Грамадства| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты