У Гродненскай каталіцкай дыяцэзіі распачаўся I Сінод

Синод
У Гродне 16 лістапада, ва ўрачыстасць Маці Божай Вострабрамскай, распачаўся I Сінод каталіцкай Гродзенскай дыяцэзіі.

Праца сінода пачалася святой Імшой ў катэдральным касцёле святога Францішка Ксаверыя з удзелам святароў і кансэкраваных асобаў з усёй дыяцэзіі, а таксама першага сакратара Апостальскай нунцыятуры ў Беларусі прэлата Марынко Антолавіча, паведамляе catholic.by.

Святую Імшу ўзначаліў ардынарый Гродзенскай дыяцэзіі біскуп Аляксандр Кашкевіч. Іерарх адзначыў важнасць таго факту, што Сінод распачынаецца ва ўрачыстасць Маці Божай Вострабрамскай – Маці Міласэрнасці, апякункі Гродзенскай дыяцэзіі. «Марыя – гэта сапраўдная вера, пакора і паслухмянасць веры, гэта той прыклад, да якога мы павінны імкнуцца», – адзначыў біскуп.

Святой Імшы папярэднічала адарацыя Найсвяцейшага Сакрамэнту і адмысловы даклад генеральнага сакратара дыяцэзіяльнага Сіноду ксяндза-каноніка Антонія Грэмзы.

Важнай часткай Сінода стане ўдзел у ім свецкіх вернікаў. Іх веды і досвед запатрабаваныя ў аналізе выклікаў, з якімі сутыкаецца католікі ў штодзённым жыцці.

«Заданне Касцёла – у адчуванні свету. Касцёл мае абавязак сачыць за знакамі і выклікамі часу, даючы адказы пра сэнс жыцця розным пакаленням. Наша задача – захаваць вернасць традыцыям Касцёла, спалучыць іх з адказамі на выклікі сучаснасці і галоўнае – працягваць жыць Евангеллем», – падкрэсліў кс. Антоній Грэмза.

Асноўныя этапы працы Сінода: вызначэнне тэмаў для яго дзейнасці, праца ў парафіяльных групах і ўнясенне прапаноў свецкіх вернікаў, правядзенне прамежкавых сесіяў Сінода і выпрацоўка рабочых статутаў з наступным іх абмеркаваннем і ўнясеннем дапрацовак.

Для працы Сінода ўжо створаныя 12 асноўных камісій і дзве дадатковыя. Усе камісіі акрэсліваюць тую ці іншую тэму, якой займаецца Касцёл: харытатыўны рух, кансэкраванае жыццё, справы экуменізму, тэмы сям’і, пакліканняў, новай евангелізацыі, місій, захавання спадчыны, катэхезаў, душпастырства моладзі, каталіцкіх СМІ і г.д.

Першае пасяджэнне святароў, якія ўзначальваюць гэтыя камісіі, распачнецца ў Гродне 5 снежня.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com
17.11.2017 Навіны цэркваў| Тэгі: , , , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты