Архіепіскап Віцебскі ўзнагародзіў медалямі мітрапаліта Паўла і Леаніда Гуляку

Павел
У Віцебску 19 снежня адбыліся ўрачыстасці, прысвечаныя 25-годдзю адраджэння праваслаўнай Віцебскай і Аршанскай епархіі.

Святочныя мерапрыемствы пачаліся Боскай літургіяй у кафедральным Успенскім саборы, якую ўзначаліў мітрапаліт Мінскі і Заслаўскі Павал, Патрыяршы Экзарх усяе Беларусі.

Патрыяршаму Экзарху саслужылі архіепіскап Віцебскі і Аршанскі Дзімітрый, епіскап Магілёўскі і Мсціслаўскі Сафроній, епіскап Гомельскі і Жлобінскі Стэфан, епіскап Тураўскі і Мазырскі Леанід, кіраўнік справамі Мінскай Экзарх архімандрыт Сергій (Брыч), сакратар Віцебскага епархіяльнага ўпраўлення протаіерэй Уладзімір Разановіч, а таксама настаяцелі і клірыкі храмаў Віцебскай епархіі, паведамляе vitprav.by.

Літургічныя спевы выканаў хор кафедральнага сабора пад кіраваннем Вольгі Янчанкі. Пропаведзь перад прычасцем прамовіў першы прарэктар Віцебскай духоўнай семінарыі протаіерэй Канстанцін Ізафатаў.

Пасля  богаслужбы архіепіскап Дзімітрый ўзнагародзіў епархіяльнымі медалямі Святога Уладзіміра спавядальніка Віцебскага I ступені мітрапаліта Мінскага і Заслаўскага Паўла, Упаўнаважанага па справах рэлігіяў і нацыянальнасцяў Беларусі Леаніда Гуляку, старшыні Віцебскага абласнога Савета дэпутатаў Уладзіміра Цярэнцьева.

У слове ў адказ Леанід Гуляка нагадаў, што Праваслаўная Царква закліканая быць маральнай і духоўнай апорай суверэннай дзяржавы.

Патрыяршы Экзарх усяе Беларусі, віншуючы архіепіскапа Дзімітрыя, духавенства і свецкіх Віцебскай епархіі, адзначыў, што ўрачыстая богаслужба праходзіла ў кафедральным саборы, адноўленым працай архіепіскапа Віцебскага і Аршанскага Дзімітрыя.

Пасля богаслужбы мітрапаліт Павел наведаў Віцебскую духоўную семінарыю.

Пасля ў Віцебскай абласной філармоніі адбыўся святочны вечар. Мітрапаліт Павел у сваім віншаванні пажадаў, каб святочны настрой заставаўся з вернікамі Віцебскай епархіі заўсёды: «І так будзе, калі мы, як і апосталы, якія вярнуліся пасля ушэсця ў Ерусалім, будзем знаходзіцца ў аднадумстве, згодзе і малітве».

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Па магчымых пытаннях звяртайцеся на krynica.editor@gmail.com




Блогі