У Віцебску ў гонар Раства Хрыстова адбыўся конкурс на лепшае выкананне песні (фотарэпартаж)

25 снежня ў Віцебску вернікі царквы хрысціян веры Евангельскай “Новае жыццё” па шматгадовай традыцыі зладзілі Дзень Нараджэння Ісуса Хрыста ў рэстаране, куды запрасілі сваіх знаёмых, якія наведваюць царкоўныя службы або вельмі рэдка, або ніколі.

Сёлета на свята сабралася каля 130 чалавек у рэстаране “Планета”. У гонар нараджэння Сына Божага быў арганізаваны конкурс на лепшае выкананне песні. Сем выканаўцаў змагаліся за першае месца. У якасці журы выступалі госці. І хаця ўсе канкурсанты не з’яўляюцца прафесійнымі спевакамі, спявалі яны цудоўна. Было вельмі складана сярод выдатных выканаўцаў знайсці лепшага, таму конкурс праходзіў у два этапы. Пераможцай аказалася Дзіяна Качанава.

Госці казалі, што дзве з паловай гадзіны свята праляцелі як адно імгненне, і дзякавалі за запрашэнне. Чальцы царквы “Новае жыццё” казалі ў адказ, што будуць радыя бачыць іх на службе ў царкве кожную нядзелю.

Пастар Аляксей Сівалобаў пажадаў гасцям, каб нараджэнне Ісуса Хрыста адбылося ў кожным сэрцы, і каб кожны змог з удзячнасцю прыняць ад Бога ў падарунак збаўленне ад грахоў і жыццё вечнае.

У Евангеллі ад Лукі ў другім раздзеле распавядаецца аб нараджэнні Ісуса Хрыста наступнае:

“У тыя дні выйшаў ад кесара Аўгуста загад зрабіць перапіс па ўсёй зямлі… І пайшлі ўсе запісвацца, кожны ў свой горад. Пайшоў таксама і Язэп з Галілеі, з горада Назарэта, у Юдэю, у горад Давідаў, называны Віфляемам, бо ён быў з дому і роду Давідавага, запісацца з Марыяю, заручанаю яму жонкай, якая была цяжарная.

Калі ж былі яны там, настаў час радзіць Ёй; і нарадзіла Сына Свайго першынца, і спавіла Яго, і паклала яго ў ясьлі, бо ня было ім месца ў гасьцініцы.

… Раптам на полі пастухам зьявіўся анёл Гасподні, і слава Гасподняя апраменіла іх; і спалохаліся страхам вялікім. І сказаў ім анёл: ня бойцеся; я ўзьвяшчаю вам вялікую радасьць, якая будзе ўсім людзям: бо сёньня нарадзіўся вам у горадзе Давідавым Збаўца, Які ёсьць Хрыстос Гасподзь; … І раптоўна зьявілася з анёлам шматлікае войска нябеснае, славячы Бога і заклікаючы: слава ў вышынях Богу, і на зямлі мір, і ў людзях добрая воля.

… І пасьпяшаўшыся ў Віфляем, прыйшлі, і знайшлі Марыю і Язэпа, і Дзіцятка, Якое ляжала ў ясьлях. …І расказалі пра тое, што было абвешчана ім пра Дзіцятка Гэтае. …усе дзівіліся …

А Марыя прымала ўсе словы гэтыя, складаючы ў сэрцы Сваім. І вярнуліся пастухі, славячы і хвалячы Бога за ўсё тое, што чулі і бачылі, як ім сказана было.” (Ев.Лукі, 2:1—19)

Алёна Шабуня, Вячаслаў Лазараў (фота)

 

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар МТС: +37529 566 45 53. Па магчымых пытаннях звяртайцеся на krynica.editor@gmail.com
27.12.2017 Навіны цэркваў, Фотарэпартаж| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты