Біскупы Беларусі распавядуць Папе Францішку пра праблемы з уладамі

ccbb

Біскупы Беларусі з 31 студзеня па 7 лютага наведаюць Апостальскую Сталіцу з візітам ad limina Apostolorum. “Такі візіт будзе спрыяць развіццю Касцёла ў Беларусі”, – расказаў старшыня Канферэнцыі Каталіцкіх Біскупаў у Беларусі, арцыбіскуп Тадэвуш Кандрусевіч.

Паводле яго, падчас сустрэчы іерархі з Беларусі спачатку праінфармуюць Пантыфіка аб становішчы Касцёла ў Беларусі і асобна ў дыяцэзіях, а таксама будуць адказваць на пытанні Папы Рымскага. “Гэта першы візіт Ad limina біскупаў з Беларусі да папы Францішка, не выключана, што Пантыфіка будуць цікавіць і адносіны Касцёла з дзяржавай”, – адзначыў мітрапаліт, паведамляе Catholic.by.

Таксама іерархі будуць запрашаць Папу наведаць Беларусь, “якая чакае і не можа дачакацца візіту Святога Айца”. Плануецца абмеркаваць і сітуацыю, у якой знаходзіцца Касцёл у Беларусі. “Мы хочам падкрэсліць, што, з аднаго боку, дзяржава паважае Каталіцкі Касцёл і высока цэніць яго шматбаковую дзейнасць: выхаванне чалавека на хрысціянскіх каштоўнасцях, клопат пра моладзь, падтрымку традыцыйнага інстытуту сям’і і Божага дару жыцця, дабрачыннасць, развіццё міжканфесійных і міжхрысціянскіх адносін і да т.п. З іншага боку, мы сутыкаемся з шэрагам праблем”, – сказаў Тадэвуш Кандрусевіч.

“На сустрэчах рознага ўзроўню з прадстаўнікамі дзяржаўнай улады мы пастаянна паўтараем аб тым, што існуе вострая неабходнасць карэкціроўкі заканадаўства аб свабодзе веравызнання, якое не адпавядае сучасным рэаліям. Існуе вялікая і нявырашаная праблема са служэннем замежных святароў, у якіх мы яшчэ маем патрэбу, а таксама праблема цэлебрацыі Эўхарыстыі святарамі-гасцямі, якія не могуць гэтага рабіць без папярэдняга дазволу Упаўнаважанага па справах рэлігій і нацыянальнасцяў. Неабходна вырашаць праблему пастырскай апекі ў школах і ВНУ, вязніцах, арміі і г.д. Складана вырашаецца праблема атрымання дазволаў на будаўніцтва новых святыняў”, – распавёў ён.

“Адсутнасць канкардату паміж Апостальскім Пасадам і Беларуссю з’яўляецца вялікай перашкодай у нармальнай дзейнасці Касцёла. Бюракратычныя праблемы з атрыманнем замежнай дапамогі моцна ўскладняюць дзейнасць Касцёла і дабрачыннасці. Існуюць вялікія цяжкасці ў арганізацыі дабрачыннай працы і г.д.”, – падкрэсліў арцыбіскуп.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com
30.01.2018 Беларусь| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты