У Гродне завяршыліся ІІІ Усебеларускія дні каталіцкай моладзі

Дни
У Гродне 1 траўня завяршыліся ІІІ Усебеларускія дні каталіцкай моладзі.

Напрыканцы сустрэчы адбылася Святая Імша у фарным касцёле святога Францішка Ксаверыя, якую ўзначаліў дапаможны біскуп Гродзенскай дыяцэзіі Юзаф Станеўскі, паведамляе catholic.by.

Біскуп даверыў Богу ў малітве моладзь Беларусі і ўсіх арганізатараў сустрэчы, валанцёраў і гасцінных гродзенцаў, якія прымалі на начлег пілігрымаў: «Малюся за ўсіх вас – моладзь і нашу Беларусь. Малюся за ўсіх, хто шукае сваю дарогу, каб гэта была дарога Хрыстовая – дарога з Богам. Успомнім у малітве таксама тых маладых людзей, якія шукаюць сябе за межамі краіны, каб вярнуліся на Радзіму».

Звяртаючыся да мітрапаліта Тадэвуша Кандрусевіча, іерарх падкрэсліў, што якраз тут, у Гродне, пачынаўся шлях арцыбіскупа – яго праца, пакліканне і служэнне: «Гродзенская зямля запрашае нас дакрануцца да вытокаў веры – веры нашых бабуляў і дзядуляў, якія збераглі яе і перадалі нам. Вельмі важна, што мы сабраліся тут і сёння можам адчуць гістарычную місію гэтага касцёла – дакраніцеся да гэтых сцен і прыслухайцеся да іх гісторыі».

Іерарх заклікаў адчыніць дзверы душы Хрысту, прыгадваючы словы святога Яна Паўла ІІ, які заахвочваў «адчыніць свае дзверы насцеж – дзверы на мяжы дзяржаў і людскіх сэрцаў».

Мітрапаліт Тадэвуш Кандрусевіч на заканчэнне Імшы заахвоціў моладзь падтрымліваць свой малітоўны дух, які яна паказалі на Усебеларускай сустрэчы моладзі.

У сустрэчы бралі ўдзел каля 115 чалавек з Віцебскай дыяцэзіі, каля 130 – з Пінскай, каля 310 – з Мінска-Магілёўскай архідыяцэзіі і больш за 1300 – з Гродзенскай дыяцэзіі.

Больш за 300 сем’яў з гродзенскай парафіі Найсвяцейшага Адкупіцеля ў Дзевятоўцы прымала ў сваіх дамах удзельнікаў сустрэчы моладзі. Жыхары Гродна адгукнуліся на прапанову яшчэ ўзімку і ўжо з таго часу рыхтаваліся, каб прыняць у сваіх дамах маладых католікаў з усёй Беларусі. Парафіяне дзяліліся з пілігрымамі не толькі дахам над галавой і ежай, але і сваёй дабрынёй.

На працягу трох дзён сустрэчы гаспадары давалі сведчанне хрысціянскай гасціннасці і выканання ўчынку міласэрнасці для цела бліжняга. Па вечарах пілігрымы і сем’і сустракаліся за кубкам гарбаты, каб паразмаўляць і падзяліцца сваім сведчаннем.

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар Velcom: +375 29 6011791. Па магчымых пытаннях звяртайцеся на krynica.editor@gmail.com




Блогі