Дыялог, які паляпшае адносіны ў сям’і: у Будславе прадставілі Сужэнскія сустрэчы

SAM_3171

У сваёй гаміліі на Будслаўскім фэсце ўвечары 1 ліпеня мітрапаліт Тадэвуш Кандрусевіч закрануў тэму вялікай колькасці разводаў, якія прыносяць глыбокія перажыванні як дарослым, так і дзецям. А 2 ліпеня на свяце адбылася прэзентацыя праграмы “Сужэнскіх сустрэч”, якія ладзяцца ў розных кутках краіны дзеля таго, каб узнавіць дыялог паміж сужэнцамі ў атмасферы камфортнага адпачынку.

Больш падрабязна пра змест Сужэнскіх сустрэч распавёў Павел Кузьміцкі.

— Сужэнскія сустрэчы праводзяцца ў Пінскай дыяцэзіі ў Баранавічах, у Мінскай дыяцэзіі — у Ляскоўцы ў “Карытасе”, у Віцебскай дыяцэзіі — у Воршы ў айцоў-марыянаў. У гэтым годзе Міжнародны рух абходзіць 40 гадоў, а на Беларусі мы існуем 15. Усё тое, што адбываецца на Сужэнскіх сустрэчах, мае аўтарскую праграму. Яна накіравана на стварэнне ўмоваў для ўзаемнага паразумення. Таксама распрацаваная праграма сустрэч пасля ўік-энду і вечары для закаханых як вырашэнне будучыні для маладых людзей.

— Якія Вы бачыце станоўчыя вынікі такіх сустрэч?

— За 15 гадоў існавання праз ўік-энды прайшло больш 600 сужанстваў. Яны з’яўляюцца вельмі карыснымі у сужанствах, дзе адна асоба уцаркоўленая, касцёльная, а іншая асоба ставіцца трошкі з дыстанцыі да касцёла. Праграма ўік-энду не патрабуе рэлігійных ведаў, яна зразумелая. Сустрэча дапамагае мужу і жонцы стаць бліжэй, і ў выніку цэлае сужэнства аказваецца ў касцёле. Гэта добрыя ўмовы, каб зразумець адно аднаго і рухацца ў пэўным накірунку. Не з’яўляецца мэтай павялічэнне колькасці дзяцей, але калі сужанцы адчуюць сябе больш бяспечна, то яны натуральным спосабам адкрытыя на новае жыццё. Мы інтэгруемся ў праграму сустрэч, дзе мы даем сваё сведчанне. Нашы праграмы распрацаваныя з улікам псіхалогіі камунікацыі.

— Людзі, напэўна, ўдзячныя Вам за выратаванне сям’і, за захаванне адносін?

— Мы бачым узнёслыя выказванні пасля ўік-энду. Напрыклад, вось такія:

“Мы нанава перагарталі сваё 30-гадовае сужэнскае жыццё і зразумелі, што прыйшоў час рабіць працу над памылкамі. Просім нашага Нябеснага Настаўніка дапамагчы нам у гэтым. Хочацца быць прыкладам добрай сям’і для сваіх дзяцей і ўнукаў. Дзякуючы “Сужэнскім сустрэчам” мы зірнулі адно на аднаго па-новаму”.

“Цяжка пераацаніць значэнне гэтых уік-эндаў для нашай сям’і. Першы раз прыехалі сюды як праблемная сужэнская пара, а цяпер мы аніматары. Рэкалекцыі выратавалі наш шлюб. Такога роду мерапрыемства вельмі неабходныя”.

“Мы размаўлялі адно з адным пра складаныя праблемы, на якія ў нас не было часу, пра якія мы не ўмелі казаць, і менавіта дакрананне да гэтых тэм нас аб’яднала. Гэта былі глыбокія разважанні, якія тычацца нашага сумеснага жыцця. Яны паўсталі пад уплывам выказванняў сужонкаў-аніматараў і святара. Іх развагі абапіраліся на паўсядзённае жыццё і адначасова былі напоўнены духам Божым. Гэтым разважанням спрыяла атмасфера далікатнасці, інтымнасці. Мы ад’язджаем з пачуццём, што нашы адносіны сталі мацней”.

Але для нас вельмі важна , калі муж з жонкай уключаюцца ў штомесячную фармацыю, бо гэта не дае ім згубіцца. Рэкалекцыі напрацягу трох дзён – гэта яркая ўспышка, якая дазваляе перажыць. Але жыццё працягваецца, прыходзяць тыя ж самыя праблемныя сітуацыі. Важна пасля ўік-энду працягнуць удзел у малых групах, якія ёсць у Мінску пра Чырвоным касцёле і пры Архікатэдры, і на Залатой горцы.

— Якія, на Вашу думку, галоўныя прычыны разводаў?

— Тое, што мы бачым у сваім жыцці, і ў людзей, якія да нас прыязджаюць — гэта недахоп паразумення і немагчымасць будаваць адносіны. Людзі пачынаюць адчуваць сябе самотна і шукаць суцяшэння на старане, шукаць цеплыні за межамі сужэнства. Сустрэчы дапамагаюць менавіта будаваць адносіны ў сужэнстве, каб быць больш шчаслівейшымі і зразумелымі адно для аднаго.

Гутарыла Эла Дзвінская, фота аўтара

На здымку: Павел і Алена Кузьміцкія

Шаноўныя чытачы! Krynica.info з’яўляецца валанцёрскім праектам. Нашы журналісты не атрымліваюць заробкаў. Разам з тым праца сайту патрабуе розных выдаткаў: аплата дамену, хостынгу, тэлефонных званкоў і іншага. Таму будзем радыя, калі Вы знойдзеце магчымасць ахвяраваць сродкі на дзейнасць хрысціянскага інфармацыйнага парталу. Пералічыць сродкі можна на тэлефонны нумар МТС: +37529 566 45 53. Па магчымых пытаннях звяртайцеся на krynica.editor@gmail.com
03.07.2018 Грамадства| Тэгі: , ,


Падобныя навіны


Апошнія навіны

Апошнія навіны

Блогі
Падтрымаем сайт талакой

Абвесткі

Рубрыка

Спецпраекты